PD ministrit Klosi: Po abuzohet me ndihmën ekonomike, verifiko listat

Ministri Blendi  Klosi ka prezantuar në Komisionin e Çështjeve Sociale buxhetin e vitit 2017, por deputetët e opozitës sollën shembuj, ku sipas tyre ka patur abuzime pë të përfituar ndihmën ekonomike. Ministri Klosi garantoi ngritjen e një grupi pune për të verifikuar abuzimet.

Buxhetin prej 67 miliard lekë parashikuar në vitin 2017, Ministria e  Mirëqënies Sociale dhe Rinisë do ta përdorë për të vijuar me reformat, si atë te pensioneve, ndihmës ekonomike, pagesën e paaftësisë, dëmshpërblimet për ish të përndjekurit si dhe investimet në arsimin profesional.

Klosi: Kemi bërë reforma të thella. Me këto para që kemi dhe me këtë buxhet që kemi do tu drejtohemi më qartazi grupimeve shoqërore dhe më me transparencë.

Deputetët e opozitës në Komisionin e Çështjeve Sociale dhe Shëndetësisë sollën shembuj të abuzimit me ndihmën ekonomike, ku vetëm në qarkun e Elbasanit, sipas tyre, 22 persona kanë përfituar ndihmë ekonomike në mënyrë të padrejtë.

Arbiola Halimi: Kanë vila, kanë biznese dhe që njëkohësisht marrin dhe pagesën e ndihmës ekonomike. Në komunën Mjekës, në Elbasan.

Klosi: Duhet të kisha emra konkret për tu dhënë përgjigje konkrete sze pse këto 22 familje janë cilësuar si më të varfrit e më të varfërve.

Albana Vokshi: Zoti Ministër, unë nuk mendoj që zonja deputete e opozitës duhet të bëjë punën e qeverisë, prandaj jeni në qeveri ju.

Klosi: Po kjo ngriti shqetësim.

Vokshi: Ajo denoncoi një fakt, ka emra konkretë, mund të bëni një kontroll.

Klosi: Dakord. E dini shumë mirë që kjo reformë nuk u bë asnjëherë nga ju, po bëhet nga ne.

Vokshi: E kemi bërë ne.

Klosi: Po ç’keni bërë?

Vokshi: E kemi firmosur ne, e kemi negociuar ne. Janë 38 milion euro,ju thamë ja bëni ndihmën ekonomike.

Për arsimin profesional numri i të regjistruarve është 2-fishuar në 2016 krahasuar me 2013.

Ministri Klosi raportoi se këtë vit janë regjistruar 27 mijë persona nga 13.000 të regjistruar 2 vite më parë.