Perez elozhe për Ronaldon dhe Zidane: Reali është shtëpia e tyre

Florentino Perez rikthehet të flasë për Cristiano Ronaldon. Lamtumira e portugezit bëri shumë bujë në botë, por presidenti i madrilenëve ka shprehur vlerësim për ish-futbollistin e tij në asamblenë e ortakëve të klubit.

“Ronaldo është golashënuesi më i mirë në historinë e klubit, e historia e tij do të kujtohet brez pas brezi. Për mendimin tim, ai ishte pasuesi i denjë i Di Stefanos. Dua të falenderoj pafundësisht Cristianon.”

Fjalët e Perez, mes duartrokitjeve të asamblesë, nuk munguan as për arkitkektin e ekipit, Zinedine Zidane, i cili fitoi tre Champions me Realin, e dha dorëheqjen në fund të sezonit të shkuar.

“Zizou do të jetë gjithmonë një pikë referimi për ne. Si trajner i ekipit të parë, ai ka hyrë në historinë si një prej njerëzve më të mëdhenj të Real Madrid. Edhe ai, si Cristiano, e di shumë mirë se kjo do të jetë gjithmonë shtëpia e tij”.