Platforma për ringritjen e PD, Bode: Rizgjedhja e Kryetarit nuk negociohet

Ish-deputetët e Partisë Demokratike, Ridvan Bode dhe Astrit Patozi, një ditë pasi bën publik platformën për ringritjen e PD-së, ditën e sotme zhvilluan një takim informues me gazetarët.

Patozi u shpreh se platforma e paraqitur dje rrëzon idenë e fraksioneve në Partinë Demokratike. Të njëjtën gjë tha edhe Bode, i cili shtoi se qëllimi i kësaj lëvizje brenda PD është bashkimi përmes një analize të thellë dhe jo të diktuar e më pas të shkohet në zgjedhje në gjithë nivelet. Ndërsa nënvizoi se rizgjedhja e kryetarit të PD-së është kusht i panegociueshëm.

“Një grup drejtuesish të PD-së, anëtarë të Kryesisë dhe Këshillit, ish-drejtues i janë drejtuar anëtarësisë për një proces që synon unifikimin e partisë, për një proces zgjedhor të përgjithshëm. Bashkimi i PD-së përmes një procesi zgjedhor është qëllimi ynë. Të kërkohet ndjesë publike. Të mundësohet hapja e një debati për kapërcimin e problemit që ka lidershipi, i cili vuan nga mungesa e kredibilitetit. Nuk kemi organizim juridik por lëvizje brenda PD. Do i drejtohemi dhe zyrtarisht partisë, por tashmë kërkesa është publike. Do takojmë demokratët anembanë Shqipërisë. Do jetë një platformë që do ta diskutojmë me gjithë anëtarësinë. Qëllimi i lëvizjes nuk është të gjejë konsensus mes nesh e drejtuesve aktual, qëllimi është më i gjerë, bashkimi përmes një analize të thellë dhe jo të diktuar e më pas të shkohet në zgjedhje në gjithë nivelet përmes devizës së bashkimit. Nuk kërkojmë ndarje postesh, por pajtim përmes një debati të përgjithshëm analize dhe zgjedhjeve. Rizgjedhja e kryetarit është kusht i panegociueshëm. Kjo i bën mirë dhe kryetarit për kredibilitetin e tij të bjerrur. Nuk po kërkojmë fraksione dhe as përfaqësim të cilësuar. Duam votime dhe të drejta të barabarta në votime dhe le të jetë anëtarësia që të vendosë”.

Platforma e publikuar ditën e djeshme mbështetet nga disa ish-drejtues dhe deputetë të Partisë Demokratike si Majlinda Bregu, Besnik Mustafaj, Julian Deda, ndërsa bie në sy nuk ndodhet Jozefina Topalli, Eduard Selami, Genc Ruli dhe Arben Imami.