Presidenti i Mundjes, Biba sfidon deputetin Ndoka mes polemikave

Martin Biba u rizgjodh mes polemikave dhe tensionit President i Federatës Shqiptare të Mundjes me 10 vota pro dhe asnjë kundër në  Asamblenë Zgjedhorë që u zhvillua në ambientet e Hotel “Rogner”. Për shkak se ekzistonin dy lista të mandatuarish, polemikat mes kandidatëve kanë nisur që në fillim të Asamblesë, aq sa rivali i Bibës, deputeti i majtë, Arben Ndoka, e braktisi Asamblenë.

 Të njëjtën gjë bënë edhe përfaqësuesit e Ministrisë së Arsimit dhe Sporteve, zv. Ministri Rauf Dimraj dhe drejtori i sporteve Vladimir Gjoni. Përfaqësuesi i Komitetit Olimpik Kombëtar Shqiptar, Viron Bezhani ishte ndër të parët që braktisi Asamblenë. Kjo do të thotë se Asambleja Zgjedhore e Federatës Shqiptare të Mundjes pritet të mos njihet nga institucionet shtetërore.

Arben Ndoka pretendon se Biba padrejtësisht na ka regjistruar disa të mandatuar të ligjshëm, por kreu u mundjes ka argumentuar se thjesht është zbatuar rregullorja, pasi personat me të drejtë vote duhet të regjistrohen të paktën 20 ditë para asamblesë.

Pavarësisht kundërshtive u vendos që të kryhej votimi ku morën pjesë 12 nga 16 klube, ndër të cilët 10 votuan pro dhe dy i nxorën votat të pavlefshme. Kryesia e re do të përbëhet nga Shkëlqim Troplini, Erzen Breçani, Besim Kukaj, Seit Fishta, Shkëlzen Betaj dhe Ndoc Çokaj.