PS kundër kërkesës së SPAK për arrestimin e Ballukut: Masa e pezullimit nga detyra e mjaftueshme, të prezumohet pafajësia

PS dhe PD do të dalin me dy raporte për rastin e Belinda Ballukut. Kreu i grupit të PS, Taulant Balla pas përfundimit të mbledhjes së Këshillit të Mandateve tha se masa e pezullimit për Belinda Ballukun është e mjaftueshme. Raportin e socialistëve do ta hartojë kryetari i Komisionit të Ligjeve. Njëherazi edhe anëtar i Këshillit të Imunitetit. Ndërkohë, opozita do të hartojë raportin e saj, të cilat më pas i kalohen Kuvendit dhe votimi pritet të bëhet në seancën në e 5 marsit.

Në përfundim të mbledhjes së Këshillit për Imunitetin dhe Mandatet, kreu i grupit parlamentar të PS-së, Taulant Balla sqaroi se qëndrimi i 5 anëtarëve të PS është kundër kërkesës së SPAK duke thënë se ”masa e pezullimit është e mjaftueshme”. Nga ana tjetër Balla kërkon prezumimin e pafajësisë për Ballukun.

“Pala tjetër nuk kishte nevojë të shqyrtonte provat sepse e kishte vendosur qëndrimin e saj. Në rastin tonë, kam informuar Këshillin e Mandateve, ne nuk ishin dakord me atë mënyrë se si ka ardhur, si është propozuar. Do të kemi një informim nga ana ime dhe anëtarëve të tjerë në mbledhjen e parë që të ketë grupi parlamentar i Partisë Socialiste. Sepse autorizimin e jep seanca plenare. Pas atij komunikimi, sapo kolegu Ulsi Manja, të ketë hartuar plotësisht raportin në emrin e pesëshes tonë, pasi nuk pati dakordësi për të pasur dy relatorë, do ta dërgojmë në Parlament”, tha Balla.