QKR: Subjektet pasive nuk duhet të dorëzojnë bilance
Bizneset që tashmë kanë pushuar aktivitetin dhe janë me status pasiv, por ende nuk janë çregjistruar, nuk e kanë të qartë nëse duhet të dorëzojnë pasqyrat financiare në Qendrën Kombëtare të Regjistrimit.
Burimet nga QKR sqarojnë se bizneset me status pasiv nuk janë subjekt i dorëzimit të bilancit.
QKR sqaron se detyrimin për depozitimin pasqyrave financiare e kanë subjektet që janë regjistruar me përgjegjësinë tatimore tatim fitimi, të cilët duhet të depozitojnë pranë QKB-së.
Nëse subjekti për periudhën gjatë së cilës ka qenë me status aktiv ka qenë regjistruar si subjekt me përgjegjësi tatimore tatim fitimi, atëherë ky subjekt duhet të kryejë depozitimin e pasqyrave financiare, sqaron QKB.
Lista e bizneseve, që kanë deklaruar status pasiv, i ka kaluar të 95 mijë subjektet deri në fillim të korrikut. Regjistri i bizneseve pasive u krijua për herë të parë këtë vit në zbatim të ligjit të procedurave tatimore që detyrojnë tatimet të seleksionojnë listën e rregullt të tatimpaguesve nga lista fiktive, me qëllim shmangien e evazionit fiskal.
Bizneset e përfshira në këtë regjistër që janë sa 50 për qind e totalit të bizneseve (180 mijë) të raportuara nuk janë të qartë nëse duhet të raportojnë online bilancet edhe me zero aktivitet.
Mbështetur në Ligjin, “Për Regjistrimin e Biznesit” detyrimin për depozitimin e dokumenteve kanë subjektet që janë regjistruar me përgjegjësinë tatimore tatim fitimi, të cilët duhet të depozitojnë pranë QKB-së, pasqyrat financiare vjetore të skanuara në format PDF, raportin e auditimit dhe ecurisë së veprimtarisë (kur mbajtja e tyre është e detyrueshme), vendimin për miratimin e pasqyrave financiare (sipas kërkesës ligjore). Afati i fundit i dorëzimit të këtyre dokumenteve ishte data 01 gusht 2016.