Shoqja e 18-vjeçares së zhdukur: Hakmarrje ndaj prindërve për ndarjen

"Oriadën e njohim si vajzë të qetë, të sjellshme dhe mjaft të lidhur me familjen e saj". Kështu ka rrëfyer fqinja dhe shoqja e Orialda Kajtazit, adoleshentes së zhdukur në rrethana misterioze nga Durrësi, me motrën e saj, prej 3 javësh.

Në një intervistë për "Panorama", vajza me iniciale M.E. ka treguar se është habitur nga veprimi i shoqes së saj, pasi njihej si një nxënëse shumë e mirë në gjimnazin "Leonik Tomeo".

Mirëpo, shoqja e saj ka zbuluar se gjatë dy viteve të fundit, ajo qëndronte disi e veçuar nga pjesa tjetër e grupit. "Pasi u nda nga i fejuari, Orialda ndryshoi sjellje. Ajo u shkëput nga shoqëria e klasës dhe e lagjes, duke krijuar njohje të reja", tregon bashkëmoshatarja e saj. Nëna e dy motrave, Anila ka dëshmuar se vajza e saj ishte ndarë para dy vitesh nga i fejuari.

Orialda 18 vjeç dhe K.K., 14 vjeç u larguan në mënyrë misterioze nga qyteti i Durrësit, pasi helmuan me bar miu prindërit e tyre, grabitën rreth 500 mijë lekë dhe dogjën banesën. Policia nuk ka mundur t'i kthejë ende pranë familjes.