“Shpërthen” Idrizi ndaj grekëve: I garantoj se kthimi në truallin tonë është vetëm çështje kohe
Kreu i Partisë Drejtësi Integrim dhe Unitet ka reaguar ashpër pas ankesës së ambasadores së Greqisë për vendosjen e gurëve të Filatit në Sheshin “Skënderbej” nga Bashkia e Tiranës.
Idrizi ka sqaruar se ankimi i bërë nga ambasadorja e Greqisë për vendosjen e gurëve është një ndërhyrje e ulët në punët e brendshme të Shqipërisë duke e konsideruar edhe një fyerje ndaj historisë së kombit shqiptar.
“Ankimi i bërë nga ambasadorja e Greqisë për vendosjen e gurëve të Filatit nga krahina shqiptare e Çamërisë në sheshin Skënderbej është jo vetëm një ndërhyrje e ulët në punët e brendshme të Shqipërisë, por edhe një fyerje ndaj historisë së kombit shqiptar.
Në sheshin që mban emrin e heroit tonë kombëtar janë vendosur gurë nga të katërta anët e trungut etnik shqiptar dhe kuptohet që Çamëria është pjesë e pamohueshme e historisë së kombit tonë.
Përpos kësaj, më habit se si gojë Greqia të ankohet, kur dihet që jo vetëm ka gllabëruar trojet etnike shqiptare dhe mohon të drejtat e pakicave etnike por ka ushqyer vazhdimisht pretendime të tjera ndaj territorit shqiptar.
Mjafton të shikohen emrat e qyteteve të Republikës së Shqipërisë të gdhendur në murin e Parlamentit në sheshin Sintagma të Athinës për të kuptuar që oreksi shovenist i Megali Idesë vazhdon të jetë gjallë në politikën greke.
Prandaj i bëj thirrje ambasadores greke, që të heqi dorë nga çdo përpjekje për të fshehur të vërtetën apo për të shtrëmbëruar historinë e Çamërisë, dhe të pranojë njëherë e mirë që ai truall që është zaptuar dhunshëm nga shteti grek, ka të zotët e vetë, dhe ata janë shqiptarë,” shkruan Idrizi në Facebook.
Ndërkohë në fund Idrizi jep garancinë se dita kur çamët do të kthehen në trojet e tyre është duke u afruar gjithnjë e më tepër.
“Unë e siguroj atë, që kthimi ynë në atë truall, është vetëm çështje kohë. #VeçNjëAtdhe“ thotë Idrizi.
KOHA JONË SONDAZH
