Shpëtim Gjika nga spitali i Tiranës, në prokurorinë e Vlorës

Kryetari i Bashkisë së Vlorës, Shpëtim Gjika, i vënë nën akuzë për shpërdorim detyre dhe falsifikim dokumentesh, u arrestua pak ditë më parë, por përfundoi në spital, me probleme shëndetësore. Pas daljes nga spitali Amerikan në Tiranë, ai u paraqit dje për të dhënë  dëshmi në prokurorinë e Vlorës.  Gjika nuk u kthye më në burg pas vendimit të gjykatës, e cila në rivlerësimin e masës se sigurisë ndaj tij, e ndryshoi atë në “detyrim paraqitje” nga “arrest me burg”, që i ishte vendosur në mungesë. Pas kthimit në Vlorë, Shpëtim Gjika mësohet se ka qëndruar në ambientet e organit të akuzës për rreth 20 minuta dhe më pas është kthyer në banesën e tij.  Në zbatim të vendimit të gjykatës së këtij qyteti “detyrim me paraqitje”, Gjika  ka firmosur në prokurori edhe një procesverbal për paraqitjen e tij. Mësohet se përballë prokurorit të çështjes, Gjika nuk ka pranuar të japë shpjegime për akuzat ë i janë ngritur. Kjo seancë, sipas kryeprokurorit të Vlorës, do të kryhet në një moment tjetër. Kryetari i Bashkisë së Vlorës, Shpëtim Gjika, në mandatin e tij të tretë, është akuzuar për shpërdorim detyre, falsifikim të dokumenteve për ndërtimin e një pallati 11- katësh në Vlorë, si dhe pengim te hetimit. Gjika u arrestua më 6 shkurt 2015, ndërkohë që pallati për të cilin ai akuzohet, është bllokuar nga shteti.  Gjykata dha masën e arrestit detyrim me paraqitje duke e argumentuar me gjendjen e tij shëndetësore, por ky ndryshim është apeluar nga prokuroria. Këtë javë pritet që Gjykata e Apelit në Vlorë të caktojë seancën për ndryshimin ose jo të masës së sigurisë për rikthimin e Gjikës në qeli  Më 13 shkurt 2015 Prokuroria e Vlorës ka dorëzuar në Gjykatën e Apelit kërkesën për ndryshimin e masës së sigurisë. Sipas organit të akuzës, Gjykata ka mbajtur qëndrime të ndryshme për raste të njëjta gjatë pyetjes së të arrestuarve duke lënë të lirë kreun e bashkisë, Gjika, por duke mbajtur në arrest me burg biznesmenin Artur Haxhi, pronarin e pallatit 11-katësh, si dhe shefen e Urbanistikës, Doriana Sulaj, të cilët ndodhen aktualisht në qeli, në pritje të gjykimit.