Shqipëria bie në “Doing Business”- Raporti i Bankës Botërore, zbret në vendin e 65-të

Shqipëria ka humbur plot 7 pozicione në renditjen më të fundit të “Doing Business”, që është pa diskutim dokumenti më i rëndësishëm krahasues për ekonomi të ndryshme të botës, në bazë të asaj që i ofrojnë sipërmarrjes.

Raporti i lehtësisë së të bërit biznes publikohet çdo vit nga Banka Botërore, dhe është raporti më i rëndësishëm i institucionit. Në raportin e këtij viti, Shqipëria ka zbritur në vendin e 65-të në renditje, ndërkohë që një vit më parë renditej e 58-ta. Vitin e kaluar, raporti bëri mjaft jehonë për vetë faktin se, Shqipëria fitonte 32 pozicione në renditje dhe nga vetë qeveria u cilësua si një arritje historike.

Në krahasim me vendet e tjera të rajonit ndërkohë, vendi ynë vazhdon të lërë pas Bosnje Hercegovinën, por edhe Greqinë, ndërkohë që vendi që na ka kaluar ndjeshëm është Kosova, nga vendi i 60-të i një viti më parë, në të 40-tin sot.

Madje, Kosova ka lënë pas në renditje edhe Serbinë, duke u bërë një prej ekonomive më tërheqëse në rajon për të bërë biznes. Vendin e parë, të padiskutueshëm vijon ta  mbajë Maqedonia, e renditur e 11-ta në botë, duke humbur vetëm një pozicion në krahasim me vjet.

Në total, Banka Botërore analizon 190 ekonomi të ndryshme të botës, në bazë të lehtësisë së të bërit biznes.

Raporti i këtij viti, që shënjon edhe edicionin e 15-të, vendos një fokus të veçantë te tregu i punës. Indeksi përpilohet mbi bazën e 4 nën-indikatorëve; fillimin e një biznesi, ku Shqipëria renditet e 45-ta në botë, lejet e ndërtimit, parë nga këndvështrimi i biznesit, ku Shqipëria renditet e 106-ta në botë, marrjen e elektricitetit, e 157-ta, dhe regjistri i pronës, në vendin e 103-të në botë. Në krahasim me vitin e kaluar, ai i elektricitetit dhe ai i fillimit të një biznesi kanë pësuar një rënie të lehtë.

/SCAN