Skema e re e ndihmës ekonomike. Banka Botwrore: Nga reformat të identifikohen gabimet e së kaluarës
Qytetarët që janë pjesë e ndihmës ekonomike dhe ata, të cilët duan që të aplikojnë, tanimë do t’i nënshtrohen një skeme të re, ku i gjithë dokumentacioni do të ofrohet nga administratorët e bashkive.
Ministri i Mirëqënies Sociale dhe Rinisë, Blendi Klosi, prezantoi sot skemën e re të ndihmës ekonomike, qe sipas tij, shmang sorollatjet e familjarëve për të plotësuar dokumentacionin.
Ndërsa, përfaqësuesi i Bankës Botërore në Shqipëri, Tahseen Sayed tha se e rëndësishme është efiçenca e reformave. Duke theksuar se Shqipëria ka nevojë për politika të reja, Tahsen tha se duhet të identifikohen gabimet në të kaluarën me skemën e ndihmës ekonomike.
“Shqipëria ka nevojë për politika të reja. Duhet të modernizohet administrata. Tashmë është anashkaluar situata kur punohej me dosje. Ka rëndësi të krijohet baza e të dhënave. Synimi ynë është që sistemi të ishte më transparent. Duhet të identifikohen gabimet në të kaluarën me skemën”, tha Sayed.