Sot dhe nesër reshje me intensitet të lartë në veri dhe jug të vendit

Instituti i Gjeoshkencave (IGJEO) ka publikuar parashikimin më të fundit mbi rrezikun nga përmbytjet, duke paralajmëruar reshje intensive dhe situata problematike në disa zona të vendit.

Sipas IGJEO-s, pasditen e sotme dhe ditën e nesërme priten reshje me intensitet të lartë, kryesisht në veri dhe jug të Shqipërisë. Qarqet Shkodër, Kukës, Vlorë dhe Gjirokastër konsiderohen më të rrezikuarat, me mundësi për vërshime të shpejta të lumenjve të vegjël malorë dhe rrëshqitje dherash. Përmbytje të lokalizuara mund të shfaqen edhe në zonat urbane, si pasojë e mbingarkesës së kanalizimeve.

Për periudhën 4–8 janar 2026 parashikohen reshje intensive të vazhdueshme, që mund të shkaktojnë rritje të ndjeshme të niveleve ujore në lumenjtë Drin-Buna, Mat, Shkumbin dhe Vjosë, si edhe në Liqenin e Shkodrës.

Autoritetet u bëjnë thirrje qytetarëve dhe institucioneve vendore të ndjekin njoftimet zyrtare dhe të tregojnë kujdes të shtuar, veçanërisht në zonat pranë lumenjve dhe përrenjve, ndërsa IGJEO njofton se do të vijojë me përditësime të mëtejshme në varësi të situatës.