Spiropali: Investimi për arsimin dhe fëmijët, investimi më i mirë për shoqërinë

Kryetarja e Kuvendit, Elisa Spiropali, zhvilloi sot një vizitë në shkollën “Fatos Lami” në Zall Mner, Kamëz, e cila u rinkostruktua për vitin shkollor 2024-2025.

Të pranishëm në aktivitet ishin Kryetari i Bashkisë Kamëz, Rakip Suli dhe deputetja Lindita Nikolla.

Gjatë vizitës, Kryetarja Spiropali bashkëbisedoi me drejtuesit, mësuesit dhe disa nxënës të shkollës.

Kryetarja Spiropali shprehu vlerësimet për investimet në infrastrukturën arsimore ndërsa theksoi mbështetjen e vazhdueshme për arsimin.
“Lajm i mirë për fëmijët. Me vjen mirë që kjo infrastrukturë ka qenë prioritet. Infrastruktura arsimore, ka ndikim të gjerë, për fëmijët, prindërit, për të ardhmen. Besoj se nuk ka investim më të mirë se në arsim. Ndërsa zgjidhja që është dhënë për bursat për ekselentët është një akt shumë i rëndësishëm. Përgëzime për këtë investim, do jemi gjithmone krah jush.”-u shpreh Spiropali.

Pas inspektimit të shkollës “Fatos Lami” e cila është pjesë e projektit të MAS “Laboratorët Smart”, Spiropali, zhvilloi edhe një vizitë në Kopshtin Nr.12 “Topolino”.

Kryetarja Spiropali u shpreh se ky është investimi me i mirë që bëhet për politikat sociale. “Përgëzime për këto politika sociale të cilat kam besimin se do të vazhdojnë. Do të keni mbështetje të vazhdueshme”-u shpreh Spiropali.