Super-autostrada që do të lidh Britaninë e Madhe me SHBA-në, nëpërmjet Rusisë

Britania mund të lidhet me Amerikën nëpërmjet rrugës, nëse vihet në jetë projekti tejet ambicioz i Akademisë ruse së Shkencave.

Një propozim tejet strategjik ka mbërritur në tavolinën e presidentit Vladimir Putin, ku është hedhur ideja për ndërtimin e autostradës më të madhe në botë, rreth 12,400 milje, e cila do të lidh skajin më perëndimor të Rusisë me ngushticën e Beringut pranë Alaskës.

Ky projekt ambicioz përfshin edhe lidhjen me hekurudhën Trans-Siberiane apo ndërtimin e gazsjellësve përgjatë autostradës.

Kreu i Akademisë së Shkencave të Rusisë, Vladimir Fortov ia ka dorëzuar planin “Rripi i zhvillimit Trans-Eurasian” presidentit Putin, por nuk ka një shifër të saktë se sa mund të kushtojë ai. Fortov ka deklaruar se: “Projekti është shumë ambicioz dhe i kushtueshëm, por do të zgjidh shumë probleme në zhvillimin e atij rajoni të gjerë.”

Krijuesit e këtij projekti shprehen se ndërtimi i tij do të kërkojë triliona dollarë, por insistojnë se përfitimet ekonomike që do të ketë Rusia, tejkalojnë çdo kosto.