Superhëna, ja pamjet që mrekulluan dje botën
Hëna iu afrua Tokës në pikën më të afërt të orbitës së saj që prej vitit 1948. Njerëzit në të gjithë botën dolën në rrugë apo u ngjitën në ndërtesa të larta për të shijuar këtë fenomen natyror të bukur e të rrallë.
Orbita e hënës është eliptike dhe jo rrethore, arsye për të cilën ajo herë pas herë është më pranë tokës. Kur perigjeu, qasja e saj më e afrët ndaj Tokës, përkon me Hënën e plotë, krijohet fenomeni që njihet si superhëna.
Kjo e fundit arriti pikën e saj më të shndritshme mbi Azi mbrëmjen e së hënës. Superhëna shfaqet 14% më e madhe dhe 20% më e shndritshme se sa zakonisht.
Herën tjetër që do të kemi një superhënë do të jetë data 25 nëntor 2034. Madje, atëherë Hëna do të jetë edhe më pranë Tokës duke dhuruar një spektakël edhe më të madh.
Për ata që duan të bëjnë fotot të paharrueshme, ekspertët këshillojnë që të fotografojnë Hënën bashkë me një pikë referimi, si një ndërtesë e lartë apo diçka e ngjashme.