Tahiri në sytë e medieve ndërkombëtare

E enjta e kuvendit, u shua nga deklarata prej 28 minutash e 9 sekondash e ish-ministrit të Brendshëm. Saimir Tahiri dorëzoi mandatin e deputetit, dhe lëshoi një lum akuzash, edhe për kolegët e PS-së. Ky vendim gjeti pasyqrim në mediet ndërkombëtare.

”Zëri i Amerikës” nënvizon se emri i tij është dëgjuar disa herë të përmendej mes anëtarëve të një bande të trafikimit të drogës. Ndërsa ”Associated Press”, thekson se vendimi i tij është bërë për të mos penguar rrugën e Shqipërisë drejt BE-së.

”Ish-ministri i Brendshëm u vu nën akuzë Nëntorin e shkuar, për dyshimet se kishte lidhje me grupin e vëllezërve Habilaj, kushërinj të tij, të cilët ishin pjesë e një organizate italo-shqiptare, e cila trafikonte marijuanë nga Shqipëria drejt Italisë. Hetimet nisën pasi autoritetet italiane goditën këtë organizatë në Catania, ndërsa në përgjimet e kryera, emri i tij përmendet disa herë në bisedat mes trafikantëve”,-shkruhet në artikullin e ”Zërit të Amerikës”.

Ky zhvillim ka gjetur pasqyrim edhe në agjencinë ndërkombëtare të lajmeve, Associated Press. ”Saimir Tahiri të enjten dorëzoi mandatin e tij në mënyrë që hetimi të mos qëndrojë në rrugën e integrimit të Shqipërisë në Bashkimin Europian”, nënvizon agjencia prestigjoze. Artikulli i Associated Press është publikuar dhe në mediat amerikane si Fox News, Uashington Post, Abc News dhe shumë të tjera.