Të trajtosh kancerin e mushkërive me krimba toke

Shkencëtarët polakë thonë se studimi i tyre mbi përdorimin e mundshëm të lëngut të krimbave për trajtimin e kancerit në mushkëri ka sjellë rezultate premtuese. Krimbat e tokës ushqehen me kërpudha, bakterie dhe mbeturinat e bimëve të pranishme në tokë dhe tretin çdo mikroorganizëm, si patogjenë ashtu edhe jo patogjenë.

Për të mbijetuar në një mjedis të tillë, krimbat e tokës kanë evoluar duke krijuar një sistem imunitar të aftë për të mbrojtur veten nga infeksionet. Një nga këto mekanizma është në zorrët e tyre, të cilat prodhojnë substanca shumë të fuqishme bio-shkatërrimtare dhe antibiotike.

Në provat e mëparshme laboratorike, lëngu i nxjerrë direkt nga krimbat ka vrarë qelizat e kancerit dhe qelizat e shëndetshme. Provat e fundit, rezultatet e të cilave janë dorëzuar për publikim dhe analizë të mëtejshme nga shkencëtarë të tjerë, ishin më të suksesshme.

Ato përfshinin ngrohjen e lëngut në 70 gradë celsius dhe ndryshimin e dietës së krimbave. Gjatë provave në 75 deri 80 për qind të rasteve, qelizat e kancerit të mushkërive u shkatërruan, ndërsa qelizat normale mbetën të padëmtuara. Megjithatë, shkencëtarët thonë se duhen prova dhe analiza më të hollësishme të kësaj metode.