Trump shpreh shqetësim për drejtimin politik të Evropës: Po shkon në disa udhë të këqija!

Presidenti i SHBA-së, Donald Trump, ka shprehur shqetësimin e tij për drejtimin politik të Evropës, duke deklaruar të hënën se kontinenti po shkonte “në disa drejtime të këqija”.

Ai dënoi ashpër gjobën prej 120 milionë eurosh, ekuivalente me 140 milionë dollarë, të vendosur nga Bashkimi Evropian ndaj platformës së mediave sociale X, në pronësi të Elon Musk. Duke folur në Shtëpinë e Bardhë, Trump theksoi se Evropa ishte “shumë e keqe, shumë e keqe për njerëzit” dhe paralajmëroi se Shtetet e Bashkuara nuk dëshironin që kontinenti “të ndryshonte kaq shumë”.

Ai nuk specifikoi se çfarë nënkuptonte, por shtoi se Evropa “duhet të jetë shumë e kujdesshme duke bërë shumë gjëra”.

Gjoba e BE-së, e vendosur nga autoritetet teknologjike javën e kaluar, erdhi si pasojë e shkeljes së rregullave të transparencës dixhitale dhe menaxhimit të përmbajtjes nga platforma X. Trump komentoi se nuk e kuptonte se si mund të vendosej një gjobë e tillë, duke shtuar se Musk nuk e kishte kontaktuar për ndihmë. Nga ana e tij, Elon Musk e refuzoi kategorikisht dënimin, duke iu përgjigjur ashpër njoftimit të Komisionit Evropian dhe duke ripostuar mesazhe që kritikonin vendimin. Ai theksoi se “Liria e fjalës është themeli i demokracisë”, duke nënvizuar rëndësinë e saj.

Zyrtarë të lartë amerikanë, përfshirë Sekretarin e Shtetit Marco Rubio dhe Kryetarin e FCC-së, Brendan Carr, gjithashtu dënuan veprimin e BE-së, duke e cilësuar atë si një shënjestrim të padrejtë ndaj kompanive amerikane. Megjithatë, rregullatorët e BE-së mbrojtën gjobën si proporcionale, duke argumentuar se X nuk kishte përmbushur detyrimet e transparencës. Kjo përfshinte mosdhënien e të dhënave për studiuesit, mbajtjen e një depoje të paplotë reklamash dhe përdorimin e dizajnit mashtrues në sistemin e verifikimit me shenjën blu. Shefja e teknologjisë, Henna Virkkunen, deklaroi se Akti i Shërbimeve Dixhitale (DSA) “nuk ka të bëjë me censurën” dhe zbatohet në mënyrë të barabartë për të gjitha platformat.

Ky mosmarrëveshje vjen vetëm pak ditë pasi Uashingtoni publikoi një strategji të sigurisë kombëtare, e cila paralajmëronte për një rënie të normave demokratike në Evropë. Dokumenti citonte “censurën e fjalës së lirë, shtypjen e opozitës politike, rënien e normave të lindshmërisë dhe humbjen e identiteteve kombëtare dhe vetëbesimit” si sfida kryesore për kontinentin. Një rast i ngjashëm ishte ai i TikTok-ut, i cili u përball me një shqyrtim të ngjashëm në maj, por shmangu një gjobë duke premtuar përmirësime në sistemet e tij të transparencës së reklamave dhe duke i kërkuar BE-së të zbatonte rregullat në mënyrë konsistente.