Turizmi i vakët, plazhet pothuajse të zbrazëta

Ndonëse jemi në muajin korrik, bregdeti shqiptar ende nuk ka njohur dyndje pushuesish për këtë sezon veror.

Mesa duket muaji i Ramazanit ka frenuar pjesën më të madhe të pushuesve tradicionalë, pushuesit nga Maqedonia dhe Kosova të cilët priten të dynden në ditët në vijim.

Sipas pushuesve në plazh nuk është e njëjta situatë me një vit më parë pasi në këtë periudhë të sezonit një vit më parë plazhet ishin të tejmbushura me pushues vendas e të huaj, raporton Ora News.

Situata e ngjashme është edhe në Vlorë, por pushuesit thonë së këtë sezon kushtet janë minimaliste dhe ka probleme në infrastrukturë, ku punohet masivisht për Lungomaren.

Gjithashtu, vija bregdetare e Durrësit vijon të presë një numër relativisht të ulët peshuesish, pavarësisht temperaturave të larta të stinës.

Nga informacionet e zyrave turistike pritet në ditët në vijim një shtim të fluksit të pushuesve ndërsa gjatë fundjavës priten shumë autobusë nga Kosova me pushues, duke mbipopulluar vendin.