U ofrua si kandidat për Bashkinë e Tiranës, Braçe: PS ka kohën për bërë përzgjedhje sipas statutit

Deputeti i PS-së, Erion Braçe thotë se kandidatura e Ogerta Manastirliut për drejtimin e bashkisë së Tiranës, erdhi si një emergjencë në shtatorin e kaluar, kohë kur kryeqyteti ishte në prag të zgjedhjeve të parakohshme.

Vetë Braçe është ofruar për të qenë kandidat ndërsa thotë se sot PS ka të gjithë kohën e mjaftueshme në dispozicion për të përzgjedhur garuesin sipas asaj që parashikon dhe statuti i partisë.

Deputeti thotë se dëshira për të qenë i pari i Tiranës nuk është një ambicie personale. Ndërsa kërkesën e depozituar në KQZ për të marrë të gjitha rezultatet individuale që nga zgjedhjet e vitit 1996, deputeti thotë se vlejnë vetëm për punën e tij dhe punët e bëra prej tij.

”Ishte një emergjencë në shtator, mund të ishte dhe ashtu gjëja, tani është koha e mjaftueshme që PS të bëjë një proces. Atë që parashikon statuti, siç bëhen për çdo bashki, mund të bëhen dhe për Tiranën”, tha Braçe.