Vula elektronike, ja si do funksionojë
Shërbimet që merren në rrugë dixhitale do të mund të njohin edhe vulën elektronike, krahas nënshkrimit. Në Kuvend, tashmë është dërguar për diskutim projektligji i cili do të bëjë të mundur lehtësimin e këtyre shërbimeve. Sipas hartuesve të legjislacionit, vula elektronike do të futet si element garantues për vlefshmërinë e dokumenteve krahas “nënshkrimit”.
Përdorimi i vulës do të rrisë përdorimin e dokumentit elektronik dhe do të thjeshtojë procedurat e lëshimit të tij nga institucionet, duke reduktuar, kështu, hallkat e qarkullimit të dokumentit. Hartuesit thonë se thjeshtësimi i këtyre procedurave ndikon drejtpërdrejt në përmirësimin e ofrimit të shërbimeve elektronike publike.
Vula elektronike do të mundësojë edhe procedurën e vulosjes automatike të dokumenteve nga sistemet.
Lehtësitë e nënshkrimit/vulës elektronike
-Garanci për administratën publike, që do të përdorë dokumentin elektronik
-Rritje e numrit të shërbimeve elektronike në dispozicion të qytetarëve
-Përmirësimi i vazhdueshëm të shërbimeve të ofruara online
-Rritja e shkallës së sigurisë për shërbimet e ofruara dhe ulja e korrupsionit
-Lehtësi në kohë dhe në kosto për çdo grup interesi dhe çdo proces biznesi
-Zhvillimi i nismave për qeverisjen elektronike dhe shoqërinë e informacionit.