Zyrtare! Rifillon importi i mishit nga Brazili në Shqipëri

Nis përsëri importi i mishit brazilian drejt Shqipërisë. Kreu i Qendrës së Eksporteve Shqiptare, Alban Zusi knfirmoi për AgroWeb.org se ka rifilluar importi i këtij mishi pas bllokimit nga muaji mars. Lajmi bëhet i ditur nga media përmes AFI (Albanian Food Industri) e cila njofton se pas këmbënguljes disa javore të ekspertëve të AFI, qeveria braziliane ka korrigjuar vendimin për eksportet e produkteve shtazore drejt Shqipërisë. Drejtoresha e Njësisë Ekonomike në Ministrinë e Jashtme Silvana Leskaj përmes një shkrese zyrtare njoftoi AFI se për problematikën në fjalë ishte angazhuar i ngarkuari i ministrisë sonë të jashtme në Ambasadën e Shqipërisë në Brazil për t’u konsultuar për këtë çështje me përfaqësues të Ministrisë Braziliane të Bujqësisë, shkruan bionews.al.

Pas kësaj qeveria e këtij vendi përmes një memorandumi reflektoi korigjimet e duhura. Ky memorandum e kalon Shqipërinë nga një vend që ndalohet importi i çdo lloj produkti shtazor brazilian në një vend që lejon importin. Në pranverë të këtij viti Ministria e Bujqësisë Shqiptare pezulloi importin e mishit nga disa kompani braziliane. Më pas Ministria e Bujqësisë e Brazilit vendosi një embargo totale për eksportet e mishit drejt Shqipërisë. Ky urdhër shqetësoi disa prej anëtarëve të AFI-t. Brazili është eksportuesi kryesor i mishit të viçit dhe të pulës drejt Shqipërisë. Janë disa kompani shqiptare që operojne me importet e këtyre produkteve.

Sipas INSTAT Shqipëria importon nga Brazili rreth 4 200 ton mish pule në vit,rreth 100 ton mish viçi dhe 1900 ton mish derri. Në mars të këtij viti autoritet tona nxorrën një udhëzim sipas të cilit produktet me bazë mishi nga Brazili nuk do kalojnë në territorin shqiptar, pa iu bërë më parë analizat. Kontrollet u vendosën pasi mishi i ardhur nga Brazili theu rregullat e sigurisë në vendet e Bashkimit Europian. 33 zyrtarë në Brazil u vunë nën hetim aso kohe me dyshimet se ishin përfshirë në skandalin e eksportit të mishit të viçit të kalbur. AgroWeb.org publikoi një sërë shkrimesh për ndalimin e mishit të kalbur nga Brazili në Europë. Më pas, raportoi për hyrje në Shqipëri të një ngarkese 26 tonëshe me mish pule nga Brazili, e cila rezultoi me përmbajtje të Salmonelës. AKU bëri të ditur se e kishte bllokuar këtë sasi mishi me salmonelë në pikën doganore të Durrësit. Kjo ngarkesë me mish pule, pasi u analizuar nga ISUV, rezultoi me ngarkesë të virusit “Salmonela SPP”./agro.web