Çfarë është OFL, polici elitare apo show policor?

Të hënën  e 3 Shkurtit, dolën në terren për të zbatuar ligjin special të miratuar me shpejtësi nga qeveria, ndaj personave të dënuar ose akuzuar për krim të organizuar, njësia special policore e quajtur OFL, Operacioni Forca e Ligjit.

Të maskuar me syze, kapele, veshje speciale, dhe të trajnuar për më se 6 muajsh, OFL do të jetë skuadra që do të luftojë kriminelët dhe pasuritë e tyre.

Kjo strukturë ka qenë ekzistuese në Policinë e Shtetit, por me krijimin e SPAK, do të zbatojë ligjin special të miratuar me akt normativ nga qeveria, e njohur si paketa Anti-KÇK, e cila ka efekt të përkohshëm dhe do të zbatohet deri më 31 dhjetor 2020.

Struktura e posaçme OFL parashikon kontrollin e pasurive të personave që janë dënuar për vepra të rënda penale në vitet e shkuara, si dhe sekuestrimin e pasurive të tyre në rastet e dyshimeve. OFL është në varësi të drejpërdrejtë të Drejtorit të Përgjithshëm të Policisë së Shtetit, në këtë rast Ardi Veliu, dhe drejtohet nga drejtori i Departamentit të Policisë Kriminale. Kjo strukturë, së bashku me drejtorin e policisë, merr fuqi ligjore që i lejojnë të anashkalojnë Prokurorinë dhe Gjykatën. Ajo ka ka në përbërje të saj punonjës të Policisë së Shtetit dhe ekpertë të fushave të ndryshme.

Përveç aksesit në database-in e Policisë së Shtetit, OFL-ja ka akses në informacionin apo bazën e të dhënave të institucioneve publike, përfshirë sistemin TIMS. Në shënjestër paketës anti KCK janë të gjithë personat e dënuar apo që janë nën hetim për 44 vepra të rënda penale, ku përfshihen organizata kriminale, banda e armatosur, grupet kriminale, vrasjet, organizatat terroriste, rrëmbimet, pengmarrjet, trafiqet e armëve dhe të drogës, prostitucioni, vjedhjet etj. Njësia speciale e përbërë nga 50 oficerë do të nisë punën nga qytetet e mëdha, si Tirana, Durrësi, Vlora, Shkodra, Elbasani.

Këtë të hënë aksioni anti-KCK nisi sekuestrot nga kompleksi “Golden” në Shijak, 3 shtëpi banimi dhe pikën e karburantit “Alti Oil 2008”, në pronësi të Altin Hajrit, i kërkuar për pengmarrjen dhe vrasjen makabre të Jan Prengës më 17 janar.

E më pas në Shkodër ku janë sekuestruar vila, toka e makina luksoze, të personave të dyshuar si të përfshirë në peng marrjen e Jan Prengës. Sipas ligjit anti-KCK, Drejtori I Përgjithshëm I Policisë së Shtetit urdhëron vendosjen e masës së sekuestros, nëse ka dyshime se pasuritë e subjekteve të ligjit anti KCK, janë siguruar në mënyrë të pajustifikuar, apo edhe kur kjo pasuri ka rrezik të tjetërsohet, të asgjësohet, të dëmtohet, apo transferohet.

Në rastin e masave personale, Policia duhet t’i drejtohet prokurorit brenda 24 orësh, ndërsa sa i përket sekuestros së pasurisë, duhet t’I referojë atij çështjen brenda 72 orësh nga nxjerrja e urdhrit. Para hyrjes në fuqi të aktit normative, asnjë nga këto veprime nuk mund të kryheshin pa autorizimin e Prokurorisë dhe Gjykatës.

Marrë nga Ora News