Çfarë mendojnë të rinjtë për arsimin? – Notat blihen, vetëm 1 në 4 i kënaqur

Pjesa dërrmuese e të rinjve shqiptarë shprehen se notat nëpër institucionet arsimore dhe universitetet e vendit blihen. Këtë e thotë Fondacioni “Friedrich Ebert” në studimin më të fundit për të rinjtë në Europën jug-lindore. Kështu, 77% e të rinjve të moshës 16-27 vjeç i përgjigjen me pohim pyetjes se `a janë dakord që ka raste që notat dhe provimet blihen në institucionet arsimore dhe universitetet e vendit të tyre?`. Në krahasim me raportin e kaluar, që i referohet viteve 2011-2015, vihet re një rënie e lehtë në këtë përqindje.

Në periudhën 2011-2015, 85% e të rinjve deklaronte se, notat dhe provimet blihen. Në krahasim me vendet e tjera të Europës jug-lindore ndërkohë, Shqipëria është e dyta për përqindjen më të lartë të shit-blerjes së notës, me Serbinë që zë vendin e parë, me një përqindje që fiksohet në 80%. Serbia përballet Kështu me një dyfishim të kësaj normë gjatë viteve të fundit, thotë raporti. Në Kosovë ndërkohë, përqindja e atyre që deklarojnë se ka raste të shitjes së notës, fiksohet në 62%.

Në drejtim të arsimit ndërkohë, Shqipëria mban një tjetër rekord rajonal, me vetëm 21% të të rinjve që deklarojnë se kanë bërë praktikë apo stazh gjatë shkollimit të tyre. Kjo është norma më e ulët mes vendeve të rajonit. Nga ana tjetër, sa i përket cilësisë së sistemit arsimor në vend, vetëm 26% e të rinjve shqiptarë shprehen të kënaqur. Bashkë më Kosovën dhe Maqedoninë e Veriut, kjo është ndër normat më të ulta në rajon.