Del në shitje shtëpia më e shtrenjtë në Amerikë (FOTO)

Shtëpia më e shtrenjtë në Amerikë është nxjerrë në shitje për 500 milionë dollarë.

Sipas Daily Mail, shtëpia është e  kompletuar me një klub nate, sallon bukurie, 20 dhoma gjumi dhe pamje të mrekullueshme të Los Angelesit dhe Oqeanit Paqësor.

Rezidenca, e quajtur “The One” dhe e ndërtuar nga ish-prodhuesi i filmit Nile Niami, ndodhet në majë të një kodre në lagjen më të pasur të Los Angeles të Bel Air.

Shtëpia gjithashtu përfshin një klub nate me dhomën e vet VIP, një suitë master prej 5.500 m, 11 pishina noti dhe pesë ashensorë.

Një plan i mëparshëm ishte që një nga dhomat e gjumit të ishte me qelqe në formë kandil deti, por Niami dhe ekipi i tij hoqën dorë nga tema nënujore.

Luksi i shtëpisë përfshin edhe një garazh parkimi me 30 vetura dhe një teatër filmi IMAX me 45 vende.

Niami pretendon se veçoritë speciale po ndihmojnë për të tërhequr blerësit me të cilët është duke biseduar aktualisht.

“Kur keni diçka që është po aq e rrallë sa Mona Lisa, ju mund të urdhëroni gjithçka që dëshironi për të.

Kur filloi shtëpia, nuk pata asnjë mendim për të kërkuar 500 milion dollarë, tani ka kaq shumë shitje tre-shifrore në L.A. e në botë dhe çmimi i kërkuar nuk është më i paarsyeshëm”, është shprehur ai.

Shtëpia është e përhapur në ndërtesa të ndryshme por me një kryesore dhe fqinjët janë Jennifer Aniston e Elon Musk.

Me një çmim  prej 500 milionë dollarësh, kushton gati katër herë më shumë sesa shtëpia më e shtrenjtë që është shitur ndonjëherë në Amerikë, një shtëpi në Hamptons në New York që u shit për 137 milionë dollarë në vitin 2014.