Donacione të pakta amerikane për tërmetin në Shqipëri, Marko Kepi tregon arsyen: Çfarë më thanë në ambasadë
Marko Kepi është ndoshta një ndër emrat më të njohur shqiptar, në Amerikën e largët, por muajt e fundit edhe në Shqipëri.
Ai njihet për përfshirjen e tij në politikën amerikane, si një mbështetës i Partisë Republikane dhe Presidentit Donald Trump.
Ai është shqiptari që gjithnjë ngre zërin e përfaqëson Shqipërinë e vlerat e saj në çdo aktivitet, jo vetëm shqiptar, por dhe amerikan, ku e kemi parë të kontribuojë në çdo projekt ku në fokus ka Shqipërinë dhe Shqiptarët.
Edhe për tërmetin shkatërrimtar të 26 nëntorit, Kepi së bashku me gazetarin Marin Mema, nën emrin e shoqatës së krijuar “Rrënjë Shqiptare” u gjenden përsëri pranë njerëzve në nevojë, të cilët u prekën nga ky tërmet.
I ftuar në ABC News, në studio me gazetarin Endri Xhafo, Marko Kepi tha se është duke u punuar për ndërtimin e shtëpive, që janë shkatërruar në zonën e Krujës, dhe Shijakut. Tashmë “Rrënjët Shqiptare” kanë arritur të ndërtojnë 4 shtëpi.
Përballë gazetarit Xhafo, Marko Kepi dha mendimin e tij për donacionin e qeverisë amerikane, ndaj qeverisë shqiptare për tërmetin, ku sipas tij kjo varet nga besimi që ata kanë në qeverinë shqiptare.
Kepi tha se e mendonte kështu, duke u nisur edhe nga një takim që kishte zhvilluar në ambasadën amerikane, në Shqipëri ku kishte marrë si këshillë, që fondet që kishin mbledhur bashkë me Marinin, ti menaxhonin vetë, dhe jo duke i kaluar nga qeveria.
Pjesë nga biseda në studio:
Endri Xhafo: Ju keni mbledhur 1.6 milion dollarë, gati 1/3 e asaj që SHBA dha si shtet, Mund të na shpjegoni pak si duhet ta interpretojmë këtë?
Marko Kepi: Në si organizate, me Marinin kemi bërë çmos që brenda 3 ditëve që të mblidhnim sa më shumë fonde për banorët që janë prekur nga tërmeti. Nga ana e shtetit amerikan nuk di të them pse kanë dhënë kaq pak, duhej dhënë më shumë por varet se sa besim kanë ata tek shteti dhe qeveria që ti japin fonde këtij shteti. PSH, kur ne kemi biseduar në takimin që kishim me ambasadën amerikane, pasi grumbulluam fondet, ata na dhanë një këshillë: Këshilla më e madhe që mund të të japim për këtu në Shqipëri, punoni me Marinin dhe si organizatë jashtë qeverisë.
Endri Xhafo: Këtë ja u ka thënë ambasada amerikane?
Marko Kepi: Po, pasi ne e pyetëm a keni një person këtu në Shqipëri, një departament që ne mund të punojmë me to dhe të na ndihmojnë me anë n e buxhetit, gjetjet e shtëpive etj, ata na thanë se sugjerimi më i mirë ishte ti gjenim vetë, siç jeni organizatë joqeveritare.
Endri Xhafo: Meqë flasim për transparencën, çfarë keni bërë konkretisht?
Marko Kepi: Para 3 javësh kemi marrë fondet e organizatës, sepse na vonuan 2 muaj për të ardhur fondet në organizatë. Shtëpitë i kemi filluar pasi morëm fondet, sot jemi në shtëpinë e 4-t që po ndërtojmë, sepse edhe ato kompani që po bashkëpunojmë kanë besimin tek ne, pra ndërkohë jemi ë shtëpinë e 4-t që po punojmë.
Endri Xhafo: Ku i keni ndërtuar?
Marko Kepi: Në Shijak dhe në Krujë, 3 janë në Shijak dhe 1 është në Krujë.
Endri Xhafo: Sa shtëpi keni llogaritur të ndërtoni me 1.6 milion dollarë, keni bërë një preventiv?
Marko Kepi: Diku te 40 apo 50 shtëpi por tani jemi duke planifikuar një zonë ku mund ti ndërtojmë, si një qytet të vogël, në zonën e Ishmit por akoma nuk kemi konkluduar diçka përfundimtare.
Endri Xhafo: Cila ishte shkëndija që ju çoi të mblidhnit fonde për tërmetin?
Marko Kepi: Lidhja e gjakut, një shqiptar kur ka nevojë për ndihmë të gjithëve na rreh zemra njësoj dhe jemi të gatshëm që të ndihmojmë çdo shqiptar kudo ku janë por sa i përket tërmetit, nuk e dija që kishte patur tërmet, e kam mësuar nga një bisedë me Marinin nga telefoni. Në atë moment kemi vendosur me Marinin për të hapur një fondacion që të grumbullonim sa më shumë fonde, jemi habitur që në më pak se 24 orë kemi grumbulluar 1 milion dollarë dhe kur ka arritur ditën e tretë, kemi parë që shifra arrinte në 1.6 milion dollarë.
Endri Xhafo: Fondet nga vijnë kryesisht?
Marko Kepi: Nga e gjithë bota, janë më shumë se 22mijë vetë që kanë kontribuuar.
/abcnews.al
