Foto-reportazhi nga Tirana sot/ Godina me xhama të thyer, trotuare me pllaka të shkulura e pemë zbukurimesh përtokë

Nga Herion Mesi

Pema e festave të fundvitit para Kryeministrisë u bë simboli i protestës së djeshme të mijëra të rinjve shqiptarë që pushtuan mbrëmjen e djeshme bulevardin “Dëshmorët e Kombit” në Tiranë. Revoltën e tyre për vrasjen e 25-vjeçarit Klodian Rasha ata e shkarkuan pikërisht te dritat e pemës, duke hequr një pjesë të tyre. Por nuk mjaftoi me kaq, pasi për shkaqet të paqarta bredhi shpërtheu në flakë dhe kaq mjaftoi që rrjeti i dritave të digjej i gjithi. Protesta para Kryeministrisë vjen ndërsa shefi i qeverisë ndodhet në SHBA për takime lidhur me sigurimin e vaksinës kundër Covid. Pas rastit flagrant me shembjen e godinës së Teatrit Kombëtar, e djeshmja ishte hera e dytë që ministri i Brendshëm Sandër Lleshaj, i cili vijon me arrogancën e tij të qëndrojë në detyrë bëhet shkak i grumbullimit masiv të shqiptarëve në një periudhë kur sistemi shëndetësor është futur në një kaos total nga përhapja e frikshme e pandemisë së koronavirusit.

Agjencia fotografike e lajmeve LSA ka përgatitur një foto-reportazh nga pamjet e godinave sot që u bënë objekt i sulmit të djeshëm.

Xhama të thyer, trotuarë të dëmtuar, pemë të rrëzuara është ajo që vërehet qartazi në pamjet e fiksuara nga foto-reporteri Malton Dibra gjatë ditës së sotme në kryeqytetin që bëhet gati për protestën e radhës të paralajmëruar për pasditen e sotme.

Protesta e djeshme

Për më shumë se katër orë, me qindra qytetarë protestuan duke kërkuar drejtësi për vrasjen e 25-vjeçarit Klodian Rasha nga policia në orët e para të ditës së marte. Protesta nisi në orën 16:00 para Ministrisë së Brendshme, pas një thirrjeje të shpërndarë përmes rrjeteve sociale në fillim. Tubimi para saj u shoqërua me tensione dhe përplasje mes protestuesve dhe efektivëve të policisë. Protestuesit thyen xhamat e godinës në ikje pas dështimit të disa tentativave për tu futur brenda. Më pas shumica e protestuesve u zhvendosën para Kryeministrisë. As këtu nuk ishte më e paqtë situata. U dogj dhe u rrëzua pema. Pati edhe këtu goditje me gurë dhe sende të forta ndaj policisë. Ndërsa kjo e fundit u përgjigj me gaz, spraj dhe spec djegës. Më pas situatën e mori në kontroll FNSH-ja, që u vendos si barrikadë. Edhe kjo për disa minuta u gjet nën sulme të vazhdueshme deri sa bëri shpërndarjen e protestuesve me gaz. Në ikje, protestuesit sulmuan një makinë të policisë rrugore, e parkuar në bulevard. Ata thyen xhamat e mjetit ndërsa brenda ndodhej efektivi që kur pa se situata u tensionua xhiroi gomat dhe u largua. Gjatë largimit ata vijuan sulmin me gurë ndaj godinës së Ministrisë së Brendshme duke thyer xhamat. Më pas edhe te Bashkia, me sulme me gurë ndaj godinës dhe prishjen e zbukurimeve. Ju vu flaka dhe pemës në qendër. Policia ka raportuar paraprakisht për 8 efektivë të plagosur në protesta, tre prej tyre po marrin mjekim te Trauma. Në protesta mbeti i lënduar edhe një gazetar. Më pas, protestuesit dogjën edhe disa kosha mbeturinash te  “Myslym Shyri”, në afërsi të Drejtorisë së Policisë së Tiranës.