Historia që fshihet pas këngës më të famshme të Krishtlindjeve

Çdo vit, muzika e festave dominohet nga Mariah Carey. Deri tani këngëtarja ka publikuar 3 albume me këngë Krishtlindjesh dhe jo më kot, bota e njeh si “Mbretëresha e Krishtlindjeve”. Të gjithë e dimë që kënga e saj, “All I Want For Christmas” është hiti më i famshëm i festave. Dyqanet, lokalet, qëndrat tregtare madje dhe shtëpitë pushtohen për 1 muaj rresht nga tingujt e saj, por e dini ç’fshihet pas kësaj kënge?

Historia është shumë më e thellë dhe dramatike sa atmosfera që ajo krijon. Hiti është frymëzuar nga fëmijëria tronditëse e këngëtares. Mariah, e cila vjen nga dy prindër që u përkasin racave të ndryshme është ndjerë gjithë e diskriminuar nga të tjerët. Dramat në familjen e saj nuk kanë munguar dhe kjo e bëri këngëtaren të mbyllej në vete.

“Kam dashur gjithnjë që Krishtlindjet të jenë perfekte. Mezi i prisja festat. Kisha një familje që nuk funksiononte si e tillë, që mund të prishnin gjithë atmosferën. Jo imë më, ajo përpiqej të më bënte të lumtur. Sakrifikoi shumë për mua. Kur u rrita iu betova vetes që nuk do t’i lejoja më ato ditë të përsëriteshin. I premtova se çdo vit do t’i bëja Krishtlindjet perfekte”.

Krijimi i kësaj kënge, buroi nga fëmija brenda këngëtares. “Ishte me rrezik dhe duhej shumë punë. Thashë që do ta shkruaj duke e vendosur sërish veten nën petkun e fëmijës që nuk u rrit me para, por thjesht donte të kishte një Krishtlindje të gëzuar.” Ajo u ul në studio në gusht të 1994-ës bashkë me bashkëshkruesin Walter Afanasieff dhe nisën të listonin gjithë gjërat që e bënin të lumtur gjatë Krishtlindjeve-bora, dhuratat, oxhaku, veshtulla-e të gjitha këto i përfshiu në këngë. /Anabel/