Mbahet në Tiranë Forumi i Sipërmarrjes Rumani-Shqipëri

Nga Entela Binjaku –
Është mbajtur ditën e enjte në Tiranë Forumi i Sipërmarrjes Rumani-Shqipëri.
Organizuar nga Ambasada e Rumanisë në vendin tonë aktiviteti mblodhi bashkë në sallën e konferencave të hotelit Tirana AS sipërmarrës dhe përfaqësues të Dhomave të Tregtisë dhe Industrisë nga të dyja vendet.
Në fjalën e hapjes znj. Patricia Flavia RĂDUȚ e ngarkuara me punë si Këshilltare për Ekonominë dhe Tregtinë falënderoi për gadishmërinë për bashkëpunimin dhe i ftoi të pranishmit të ndiqnin axhendën e këtij takimi.
Në forumin e 24 tetorit 2019 Ambasadori i Rumanisë në vendin tonë SH.T. Mircea Perpelea falënderoi njerëzit e biznesit që kishin udhëtuar nga Rumania dhe e konsideroi këtë aktivitet si një fillim të ri në marrëdhëniet mes dy vendeve.
“Tregu shqiptar është tërheqës dhe i gjallë. Zhvillimet që ka bërë Shqipëria japin besimin se është duke ecur në rrugën e duhur”, u shpreh z. Perpelea. Turizimi është një ndër sektorët ku Shqipëria mund të ofrojë shumë me një vijë bregdetare thuajse 10 herë më e madhe se vija bregdetare e Rumanisë edhe pse Rumania është 10 herë më madhe se Shqipëria.
Duke ju drejtuar sipërmarrësve shqiptarë, ambasadori u shpreh se Rumania ofron një numër të madh mundësish. Ai foli për hapjen si një element i rëndësishëm në dobi të të dyja vendeve.
“Mes të dyja vendeve ka një lidhje të hershme dhe si në çdo marrëdhënie tjetër, në themel qëndron besimi. Si përfaqësues i Rumanisë jam ndjerë si në shtëpi që kur kam ardhur, ndaj edhe miqtë nga Rumania i ftoj të hedhin një hap të ri në marrëdhëniet mes dy vendeve”.
Fjalën e mori z. Mihai Andritoiu, President AFPICE, Konsulli i Nderit i Mbretërisë së Kamboxhias në Rumani dhe njëherazi Presidenti i Nderit të Dhomës së Tregtisë dhe Industrisë Rumani-Shqipëri.
Ai prezantoi fillimisht kuadrin gjatë të cilit realizohet edhe ky forum. “Nisma 17+1 mbledh bashkë Përfaqësuesit e Dhomëve te Tregtisë dhe Industrisë të 17 vendeve plus Kinën. Çdo vit forumet mbahen në shtete të ndryshme dhe këtë vit po mbahet në Tiranë. Delegacioni rumun këtë vit është i madh në numër”.
Në këtë forum që po kryhet me nismën e ambasadës janë 26 përfaqësues që po marrin pjesë. Përbërja është e larmishme duke nisur me sipërmarrës që vijnë nga mjedisi, turizmi, agrobiznesi, moda, industria e makinave, por edhe nga mjediset universitare dhe të edukimit.
Presidenti i Dhomës së Tregtisë dhe Industrisë së Tiranës z. Nikolin Jaka shprehu gadishmërinë dhe mbështetjen e institucionit që ai përfaqëson dhe drejton duke propozuar edhe axhendat e përbashkëta dhe terrene bashkëpunimi të përshtatshme për të dyja palët.
Më tej në forum e mori fjalën z. Costica Mustata, Presidenti i Dhomës së Tregtisë dhe Industrisë së Bukureshtit.
I sapo zgjedhur në këtë pozicion z. Mustata shprehu befasinë e këndshme për zhvillimet që ka njohur Shqipëria në këto 25 vitet që kur ai kishte vizituar për herë të parë vendin tonë.
“Kam parë një Shqipëri tjetër ndaj dhe e përgëzoj popullin shqiptar për përparimet e bëra. Duke qenë se Shqipëria ndodhet në rrugën që paraprin aderimin në BE, këshilla ime për miqtë shqiptarë do të ishte: mos bëni gabimet që kemi bërë ne”.
Më tej z. Mustata, bëri një paraqitje të Dhomës së Tregitsë dhe Industrisë së Bukureshtit e cila “vitin që kaloi festoi edhe 150 vjetorin e themelimit. Kjo dhomë është me e vjetra në raportet mes biznesit dhe autoriteteve të shtetit”. Duke shprehur disa statistika ai tha se “kjo dhomë përfaqëson 23% të të gjitha bizneseve rumune. Bizneset në Bukuresht realizojnë 17 % nga totali i eskporteve rumune dhe përcjellin 30% nga tërësia e importeve që kryen Rumania.
Dhoma e Tregtisë dhe e Industrisë së Bukureshtit ka firmosur rreth 100 marrëveshje bashkëpunimi dhe ndaj e ftojmë edhe Dhomën e Tiranës të firmosim marrëveshjen”.
Kjo do të ishte edhe marrëveshja e parë që z. Mustata firmos në cilësinë e detyrës së re. Ai ftoi Dhomën e Tregtisë dhe Industrisë së Tiranës të vizitojnë Rumaninë pasi siç u shpreh ai: “populli rumun e simpatizon popullin shqiptar ndaj dhe marrëdhëniet e komunikimit mund të vendosen më thjeshtë”. Marrëveshja e bashkëpunimit mes të dyja Dhomave të Tregtisë kishte përfunduar ndaj dhe nga ky forum të dy presidentët vendosën të firmosin edhe marrëveshjen e re.
Në forumin e 24 tetorit një grup të madh sipërmarrësish përfaqësoheshin nga z. Dan Dragomir zv. Presidenti i Dhomës së Tregtisë dhe Industrisë së Qarkut të Vëlçeas.
“Kjo është hera e tretë që e vizitoj Shqipërinë”,- tha z. Dragomir duke i përshëndetur të pranishmit edhe me disa fjalë në gjuhën shqipe. “Vëlçea”,- tha ai,- “njihet si nga zonat më të bukura të Rumanisë, e bekuar nga 57 manastire dhe të tjera vlera që e bëjnë atë nga zonat më tërheqëse turistike”. Ai foli për 5 drejtimet kryesore të ekonomisë ku mund të bashkëpunohet mes të cilave: turizmi, mjedisi, agrobiznesi etj. Ai përmendi edhe mundësinë e vlerësimit të rivendosjes së linjës së drejtëpërdrejtë ajrore Tiranë – Bukuresht.
“Natyrisht kërkojmë të shihen se cilat janë programet qeveritar të zhvillimit në to”, u shpreh z. Dragomir, ku përfaqësuesit shqiptarë të institucioneve shtetërore mungonin.
Më tej u vijua me biseda mes pjesëmarrësve dhe takimet bilaterale.
Forumi 17+1 do të vijojë punimet gjatë ditës së premte në Hotel “Plazza”.