Ndërron jetë nga koronavirusi shqiptari në Bergamo, nipi i tij jep lajmin e trishtë: Nuk të përcolla dot në banesën e fundit

Një shqiptar ka humbur jetën nga koronavirusi në Bergamo në Itali. Lajmin e trishtë e ka bërë të ditur në mediat sociale një i afërm i viktimës.

Nipi i viktimës shkruan i pikëlluar në mediat sociale në lidhje me humbjen e xhaxhit të tij nga koronavirusi, ndërkohë që ndihet i keqardhur që nuk ishte i pranishëm ta përcillte në banesën e fundit.

Postimi i plotë

Kam shijuar pafund miqësinë tonë të veçantë, bisedat e gjata dhe sensin tënd të humorizmit…

Familjet tona kanë qënë shumë të afërta, bashkëshortja jote me time më pothuajse motra, unë me djemtë e tu si vëllezër…

Një harmoni e jashtëzakonshme na kapte të gjithëve sa herë familjet tona takoheshin. Jeta sikur bëhej më e thjeshtê, problemet, vështirësitë sikur largoheshin, koha sikur ndalej…  Për ato çaste kishim kohë të mendonim për bukurinë e jetës, për momentet e bukura që kemi kaluar dikur, edhe pse ishim të varfër, por të lumtur pafund.

Flisnim shumë dhe për objektivat e të ardhmes, përpiqeshe shumë të më mësoje gjëra që dije më mirë dhe më saktë, ndërkohë unë, si një nxënës i mirë, dëgjoja me vëmëndje. Nuk mungonin dhe  përplasjet e ideve dhe debatet, i jepnin më shumë dinamizëm bisedës dhe e bënin akoma më interesante.

Na lëndove shumë të gjithëve kur morëm vesh se ky virus i mallkuar të kishte prekur.  Pafundësisht më shumë kur morëm vesh se nuk ja dole dot. Sa keq më vjen që nuk kemi mundësi të ishim me ty të të shoqëronim për në shtëpinë e fundit.

Jam i bindur që po ikën krenar, ke lënë mbrapa emër të mirë, të një njeriu plot vlera dhe punëtor. Arrite të ndërtosh një familje me njerëz fantastik.

Do të të kujtoj gjithë jetën plot me buzëqeshje dhe respekt…

Pusho në paqe xhaxhi Besnik…