Pjesa shqiptare e Liqenit të Ohrit në UNESCO, ambasada gjermane: Vazhdojmë angazhimin tonë

Pjesa shqiptare e Liqenit të Ohrit është bërë pjesë e Trashëgimisë Botërore Natyrore dhe Kulturore të Njerëzimit.

Ambasada e Gjermanisë në Tiranën nënvizon se, “ne përgëzojmë për emërimin e pjesës shqiptare të Liqenit të Ohrit si pjesë e Trashëgimisë Botërore Natyrore dhe Kulturore të Njerëzimit”.

Me rastin e këtij suksesi, të hënën e shkuar u mblodhën në shëtitoren e Liqenit të Ohrit ministrat nga Shqipëria dhe Maqedonia e Veriut, përfaqësues lokalë nga qyteti i Pogradecit, studentë, përfaqësues të GIZ dhe KfW si dhe Ambasada Gjermane.

Drejtuesja e zyrës së Bashkëpunimit për Zhvillim në Ambasadën Gjermane, Dr. Judith Hoffmann u shpreh se, “ekosistemet nuk njohin kufij. Përpjekjet ndërkufitare që kanë çuar në këtë sukses me statusin e UNESCO-s duhet të vazhdojnë”.

“Bashkëpunimi Gjerman për Zhvillim tashmë ka dhënë një kontribut të rëndësishëm për këtë, ndër të tjera me projekte për mbrojtjen ndërkufitare të biodiversitetit dhe për përmirësimin e kanalizimeve në Pogradec. Ne do ta vazhdojmë këtë angazhim në rajon”, tha Hoffmann.