Plagoset me çifte mjelma në Pogradec, shpendi i rrallë dyshohet se u qëllua për tu balsamosur

Edhe pse moratoriumi mbetet në fuqi, gjuetisë së paligjshme nuk po i shpëtojnë as speciet e rralla.  Një mjelmë u plagos në Pogradec nga persona që dyshohet se tentuan ta vrasin për ta balsamosur.

Kjo mjelmë e plagosur u filmua në liqenin e Pogradecit.

Dëshmi se gjuetia e paligjshme vijon edhe ndaj shpendëve të rralla.

Informacionet zyrtare nga punonjës të Zonave të Mbrojtura thanë se dyshimet janë që është qëlluar me çifte nga persona te pa njohur.

Mishi i këtij shpendi nuk konsumohet, ndaj forcohet dyshimi se autori ka dashur ta vrasë për ta balsamosur.

Pas denoncimit të rastit nga qytetarët, mjelma është transportuar në qendrën e rehabilitimit në Divjakë.

Rasti mësohet se është denoncuar pranë pranë autoriteteve ligjzbatuese që thonë se po punojnë për të identifikuar njeriun që qëlloi mjelmën.

Në muajin janar, një flamingo u gjet e vrarë në Lagunën e Nartës, si dëshmi e dështimit në ndalimin e fenomenit të gjuetisë së paligjshme edhe brenda zonave të mbrojtura.

Afati moratoriumit të gjuetisë përfundon këtë vit, ndërsa ende nuk është e qartë nëse do të shtyhet sërish.