Sfidat e gazetarëve shqiptarë, vonesa pagash e kërcënime, KShH sugjeron krijimin e një sindikate

Vonesa e pagave, mungesa e kontratave apo siguria në punë, janë disa nga problemet me të cilat ndeshen gazetarët shqiptarë në mënyrë të theksuar pas pandemisë. Komiteti Shqiptar i Helsinkit prezantoi raportin për të drejtat e gazetarëve duke rekomanduar krijimin e një sindikate të punonjësve të medias. Gazetari, Lutfi Dervishi, vuri në dukje se shpesh punonjësve të medias u ka munguar solidariteti përballë sulmeve nga politika.

Gazetarët shqiptarë vazhdojnë të përballen me sfida të vështira në punën e tyre, të cilat janë rënduar edhe më shumë për shkak të pandemisë.

Komiteti Shqiptar i Helsinkit publikoi raportin studimor mbi të drejtat e punës së gazetarëve, duke evidentuar një sërë problematikash që nga vonesat e pagave, por edhe siguria dhe pavarësia editoriale.

Valbona Sulçe: Flasim për mungesë të kontratave të punës, flasim për vonesa në paga, flasim për kushte të rënduara mjedisore të cilat i pamundësojnë gazetarët të kryejnë detyrën e tyre, flasim për shtim të kërcënimeve për shkak të detyrës të gazetarëve dhe për mua kjo është shumë shqetësuese.

Pavarësisht ekzistencës së shoqatave të shumta të gazetarëve, drejtuesja e Komitetit të Helsinkit, Erida Skëndaj, tha se ka ardhur koha që gazetarët të përfaqësohen në sindikatën e tyre.

Erida Skëndaj: Për të parë realisht nevojën e krijimit të një sindikate për gazetarët, e cila fuqimisht do të adresojë problemet që gazetarët kanë.

Për gazetarin, Lutfi Dervishi, një problem më vete është edhe mungesa e solidaritetit mes gazetarëve.

Lutfi Dervishi: Mungesa e solidaritetit të gazetarëve nuk vihet re vetëm tek rastet e largimit nga puna, por vihen re dhe në përballjen e përditshme.

Përfaqësuesi i Autoritetit të Mediave Audiovizive, Arben Muka, tha se AMA ka mbajtur kontakt të vazhdueshëm më gazetarët për problematikat e tyre por shtoi se prezantimi i draft-kontratave të punës për median audio-vizive  duhet të shtrihet në gjithë spektrin e medias.

Arben Muka: Të rregullohen marrëdhëniet e punës së gazetarëve qoftë kjo dhe me produkt konkrete duke nisur me propozimin e draft-kontratave, të cilat të jenë të standardizuara.