Shqiptari çon Venezian në Parlamentin e Strazburgut

Për mjaft emigrantë shqiptarë vendi ku ata kanë emigruar e kanë ndërtuar të ardhmen e fëmijëve  është shndërruar në atdheun e tyre të dytë, pasi atje investojnë me punën e tyre por dhe kontribuojnë me iniciativat politike e qytetare.

I tillë është Emiljano Biraku, shqiptari që në e kemi njohur si kandidatin për deputet të Partisë Demokratike të Venecias në zgjedhjet e fundit politike të marsit 2018.

Me profesionin sipërmarrës e i zgjedhur nënkryetar i Partisë Demokratike të provincës së Venecias, Emiljano Biraku është një nga nismëtarët e propozimit të bërë pak ditë më parë në Parlamentin Europian të Starzburgut për t’i ardhur në ndihmë gjendjes aktuale, në të cilën ndodhet qyteti i  Venezias.

Ai së bashku me europarlamentaren Cecyle Keyenge dhe kryetarin e Përfaqësisë së komunave të territorit historik Venecias e ishujve, Andrea Martini, kanë prezantuar në komisionin europarlamentar të Strazburgut alarmin se qyteti i Venecias rrezikon të vdes nga reduktimi i dukshëm i numrit të popullsisë vendase, ndotja e madhe e ajrit si edhe nga paqëndrueshmëria preokupuese hidrologjike e lagunës së saj.

Venecia është një nga qytetet më të bukura të botës si dhe ndër qytetet me një fluks të madh turistësh që shkon mbi 28 milionë në vit e mesatarisht 77 mijë turistë në ditë.

Por Venecia  e laguna e saj, pasuri e UNESCO prej vitit 1987 bëhet çdo vit e më shumë një nga qytetet më të pa preferuara për të jetuar. 3/4 e banesave të qytetit janë në përdorim të turizmit e çdo vit ka një reduktim të djeshëm të popullsisë vendase që largohet nga qyteti për shkak të smogut të lartë shkaktuar nga anijet e mëdha turistike (Costa Corciera) që hyjnë deri në zemër të qytetit.

Pikërisht për të përballuar këtë situatë në të cilën ndodhet qyteti i tij, Emiljano Biraku së bashku me një grup banorësh vendas hartuan një projekt propozim për Parlamentin Europian për të shpallur qytetin e Venecias, kryeqyetin e gjelbër të Europës.

I prezantuar në Strazburg nga Keyenge, ky projekt, siç shprehet ajo, ka lindur nga kërkesa e qytetarëve,  dhe Parlamenti Europian ka përgjegjësinë e tij ta shpëtoj këtë qytet, pasi është një pasuri e njerëzimit.

Pas pak javësh në qytetin e Venecias pritet të aplikohet dhe taksa e re ditore për çdo turistë që do të hyj në qytet dhe për Emiljano Birakun, ky vendim është i papranueshëm pasi “do të sjell nxitjen e një turizmi në masë nga operatorët e tureve të mëdha turistike.”

Dhe pse sipërmarrës në sektorin e turizmit, benefit për biznesin e tij, Emiljano Biraku nuk pranon një sakrifikim të tillë të qytetit për hir të turizmit e kërkon me zë të fortë një turizëm më të rregullt e ndihmë  nga Parlamenti Europian për politika ekologjike në shpëtim të Venecias së tij.

/ Ora News