Shqiptari letër avokates që e sulmoi me acid: Më fal

Gjashtë vjet pasi i hodhi acid në fytyrë avokates Lucia Annibali, shqiptari Rubin Talaban, flet për herë të parë dhe tregon pendimin për veprimin e tij.

Nga burgu i Campobasso-s ku po vuan dënimin prej 12 vjetësh të dhënë nga drejtësia italiane ai i ka shkuar një letër avokates.

Më 16 prill 2013, me urdhër të ish-fejuarit të avokates, Luca Varani, Talabani i mbuluar me kapuç i hodhi acid Annibali-it, duke i djegur 66 për qind të fytyrës.

Pavarësisht se me një italishte të çalë, letra e 37-vjeçarit shqiptar e publikuar nga e përditshmja Corriere della Sera, shënon rrëfimin e parë të autorit që në gjashtë vjet ka qëndruar në heshtje.

“Më fal Lucia. Më fal për veprimin tim të padenjë dhe të dhunshëm,” shkruan Talaban në letrën e tij.

Në një reagim për gazetën Corriere della Sera, Lucia Annibali, thotë se nëse fjalët e asaj letre janë të sinqerta, ajo e fal Rubinin, por thekson se falja i shërben më shumë atij për të lehtësuar dënimin.

Pasi arriti që t’i mbijetonte sulmit të tmerrshëm me acid, avokatja Lucia Annibali u kthye në një simbol të betejës kundër dhunës ndaj grave. Avokatja Annibali arriti të gjente forcën për t’u rimëkëmbur dhe në zgjedhjet e 4 marsit 2018, u zgjodh deputete e Partisë Demokratike italiane në qytetin e Parmës.