Të paharruarit e Spaçit
Përmes muzikës dhe letërsisë, në ish-burgun famëkeq të Spaçit u përkujtuan ata që humbën jetën apo vite të tera në kampin e internimit politik. Mesazhi ishte për të mos harruar dhe mbrojtur këtë dëshmi të së shkuarës, ndërsa Drejtori i Studimeve të Krimeve të Komunizmit kritikoi politikën se ka bërë vetem retorikë.
Ata që humbën jetën por dhe ata që kaluan përmes ferrit të burgut të Spaçit u përkujtuan me muzikë e letërsi.
Të Paharruarit, cilësohen sot ata që prej aty sfiduan regjimin e egër komunist ndaj kujtesa e kësaj të vërtetë cilësohet detyrim.
Satler: Kurajo e tyre na siguroi sot një të ardhme ndryshe, por morën si shpërblim ekzekutimin dhe dënimin.
Ish-kampi famëkeq është dëshmi dhe nyje lidhëse mes të shkuarës dhe të ardhmes.
Por Ministrja e Kulturës, thekson se Spaçit nuk i duhet hequr i gjithë tisi i misterit që çdokush ka krijuar rreth tij.
Margariti: Nuk e shikoj asnjëherë me vlerë që të heqim vellon e misterit që çdokush mbart në vetëvete kur mendon për një gjë të tillë.
Agron Tufa, Drejtor i Studimeve për Krimet dhe pasojat e komunizmit që në fjalinë e parë ishte kritik ndaj politikës për mungesë vullneti për ti bërë gjërat ashtu siç duhet në këtë drejtim.
Tufa: Ekziston retorika politike sa për të kaluar rradhën dhe është hipokrizia më e thellë.
Autorët Fatos Lubonja, Bedri Coku dhe Shkëlqim Abazi, kthyen në kohë vuajtjet e tyre nëpërmjet shkrimeve në librat e tyre.