Meta me Ambasadorët e Vishegradit: Të plotësohen pa humbur kohë kushtet për hapjen e negociatave me BE

Presidenti Ilir Meta është takuar sot me Ambasadorëve të vendeve të Vishegradit në Tiranë, në ceremoninë e kalimit të Presidencës së Grupit V4, nga Çekia tek Polonia. Gjatë takimit me diplomatët, kreu i shtetit ka vlerësuar rolin e diplomatëve të Çekisë, Sllovakisë, Polonisë dhe Hungarisë që bëjnë pjesë në këtë grup.

“Me shumë kënaqësi e pranova ftesën e Ambasadorëve të vendeve të Vishegradit, për të marrë pjesë së bashku në ceremoninë e kalimit formal të Presidencës së Grupit V4, nga Çekia tek Polonia. Ekonomia dhe ndërlidhja, siguria dhe zhvillimi shoqëror janë prioritete strategjike në këtë periudhë sfidash që po kalojmë. Vlerësova prioritetet dhe objektivat ambicioze të Presidencës Polake për një V4 të fortë në një Europë të fortë, kthimin në normalitet, kontaktet ndërmjet popujve, si dhe qasjen për digjital V4 – e-V4. Mjaft të gjetura dhe domethënëse ishin vendi i takimit të sotëm, lokomotiva polake në “Bulevardin e Ri”, dhuratë e viteve ’50, si dhe motoja e Presidencës: “Back on Track” Train!”,- shprehet Presidentit Meta në një mesazh në Facebook për takimin.

Gjithashtu, Presidentit Meta ka vlerësuar rolin e vendeve të Vishegradit në mbështetje të procesit integrues së Shqipërisë. “Falenderova për mbështetjen e vazhdueshme të Grupit V4 në proceset e integrimit europian të rajonit tonë dhe shembullin e shkëlqyer të bashkëpunimit që përcjellin për vendet e Ballkanit Perëndimor. Shpreha bindjen se nën Presidencën Gjermane të Bashkimit Europian, me mbështetjen e të gjitha vendeve anëtare, si dhe duke plotësuar pa humbur më kohë kushtet për hapjen e negociatave, Shqipëria do të bëjë hapa përpara dhe të sigurt në proceset integruese”,- shprehet Presidenti Ilir Meta.