Tre vrasjet/Tonin Vocaj: Autori jo me probleme psiqike. Familjet nuk kishin denoncuar se iu rrezikohej jeta

Kreu i policisë qarkut Tiranë, Tonin Vocaj ka dhënë detaje për arrestimin e vrasësit serial të grave këtë të mërkurë.

Sipas Policisë së Shtetit, Dan Hutra, një person me precedentë të theksuar kriminalë u arrestua rreth orës 18:45 minuta në zonën e Sharrës në Tiranë dhe nuk bëri rezistencë. Gjithashtu, në këtë moment atij iu gjet dhe arma e krimit, një automatik kallashnikov.

“Ngjarja e sotme ka këtë dinamikë, në 12:15 Dan Hutra në afërsi të pallatit me shigjeta ka plagosur M.G, pas kësaj, autori është larguar me benz me targë AA531 UK që e kishte marrë me qira dhe në 12:35 ka shkuar në Kamzë. Në këtë vend ka plagosur Elena Hysa, dhe Kujtime Hysën, ish bashkëjetuesja dha nëna, ka vrarë Mevlute Husa motrën dhe të fejuarën e vëllait të ish bashkëjetueses.

Pastaj ka shkuar në Bathore, në rrugën Besëlidhje dhe 12:48 minuta ka shkuar në familjen Kurti ku ka vrarë Etleva Kurtin. Për ngjarjen e parë jemi njoftuar pasi ka ndodhur vrasja e dytë. Është kryer ekspertimi i gëzhojave, 12 në Paskuqan dhe 6 në Kamzë janë shkrepur nga e njëjta armë. Është gjetur dhe makina, policia falënderon për informacionet e shumta.

Në momentin e arrestimit nuk ka bërë rezistencë. Kemi rianalizuar veprimtarinë kriminale të autorit, nuk është evidentuar në asnjë rast që të ketë paraqitur çrregullimeve psiqike. Nuk ka pasur informacione nga familjarë për rrezik jete nga ana e tyre. Vrasja në Kamzë ka ndodhur për shkak të motiveve të tjera”, ka thënë Tonin Vocaj.