30 Qershori po ”fundoset”, 6 bashki pa kryetar

Nga: Redjon Shtylla

Nuk ka ndodhur më parë që një bashki të mos ketë drejtues dhe mesa duket, zgjedhjet moniste të 30 Qershorit, çdo ditë e më shumë po tregojnë se janë anti-kushtetuese. Në Shqipëri janë 6 bashki që nuk kanë kryetar të zgjedhur nga populli, pasi në zgjedhjet e fundit lokale mori pjesë vetëm një parti, PS-ja pasi opozita bojkoti. Vënia nën akuzë e kryebashkiakut të Mallakastrës, Qerim Ismailaj nga SPAK, nuk e përjashton mundësinë e ndërprerjes së mandatit të tij.

E para bashki që mbeti pa kryetar të zgjedhur nga procesi zgjedhor i 30 qershorit 2019 ishte Shkodra, pasi ende vijon në detyrë Voltana Ademi e votuar që në vitin 2015 dhe është kryetarja më jetëgjatë në historinë e vendit që mban një detyrë edhe pasi kanë kaluar 4 vite nga mandati.

Edhe Durrësi nuk ka kryetar të zgjedhur nga populli, por të emëruar. Valbona Sako dha dorëheqjen pak ditë pas tërmetit shkatërrimtar të nëntorit 2019 dhe e motivoi dorëheqjen me regimin publik që ngjalli një deklaratë e saj, ku tha se ”të jemi të kënaqur me 50 viktima”.

Bashkia Vorë mbeti pa kryear në nëntor 2019, kur Komisioni Qendror i Zgjedhjeve shkarkoi nga detyra Agim Kajmakun. Ai nuk kishte deklaruar në formularët e dekriminalizimit një dënim nga një gjykatë greke. Kajmaku po gjykohet në Gjykatën e Tiranës, jo vetëm për falsifikimin e formularit.

Bashkia Dibër është pa kryetar të zgjedhur, pasi ish-drejtuesi i dalë nga zgjedhjet e kaluara lokale dha dorëheqjen për të kandiduar si deputet në zgjedhjet e prillit 2021, ku nuk triumfoi.

Ndarja nga jeta për shkak të një infarkti e Haxhi Memollës, në shkurt 2020, la pa drejtues të zgjedhur Bashkinë e Rrogozhinës. Në korrik 2021, pa kryetar mbeti edhe Bashkia e Lushnjës. Fatos Tushe u shkarkua nga detyra me vendim qeverie, një ditë pasi u arrestua nga SPAK, si i dyshuar për “shpërdorim detyre”.

Gjykata Kushtetuese përfundoi shqyrtimin e padisë për ligjshmërinë e zgjedhjeve dhe tashmë është tërhequr për vendimin.