6 vjet anëtar të NATO-s, Rama: Mirënjohje anëtarëve të Aleancës

Me rastin e 6-vjetorit të anëtarësimit të Shqipërisë në NATO, Ministria e Mbrojtjes ka prezantuar sot armatimin më të ri te Forcave Speciale, në një ceremoni të organizuar në zonën e Zall Herrit. Në takim ishin të pranishëm kryeministri Edi Rama, ambasadori i Shteteve të Bashkuara, Donald Lu, ministrja e Mbrojtjes, Mimi Kodheli etj..

Kanë kaluar 6 vjet nga anëtarësimi i Shqipërisë në NATO dhe për ministren e Mbrojtjes, Mimi Kodheli, ky është një nga sukseset e Shqipërisë ndër vite. Gjatë fjalës së saj ajo u ndal tek përgjegjësitë dhe detyrimet që Shqipëria ndërmerr pas anëtarësimit. “Anëtarësi i Shqipërisë në NATO është kurorëzimi i përpjekjeve të të gjithë shqiptarëve. Procesi i anëtarësimit në NATO dhe në Bashkimin Europian e bëjnë më të sigurt Shqipërinë dhe Europën. Kjo strukturë sigurie krijon një ambjent të favorshëm për të kontribuar në ruajtjen e paqes dhe zgjedhjes së konflikteve”, theksoi Kodheli. Sipas ministres, Shqipëria çdo ditë e më shumë afrohet me modelin Perëndimor, pasi ndikimit Lindor i është thënë lamtumirë prej kohësh. ‘Para gjashtë vitesh, Shqipëria mori detyrime dhe përgjegjshmëri. Ne si aleatë morëm përgjegjshmeri të reja dhe të rëndësishme për të forcuar mbrojtjen e përbashkët. Ne si aleatë morëm masa të rëndësishme për të forcuar mbrojtjen e përbashkët”, tha ajo. “Vendet anëtare të NATO po përballen kohët e fundit me rreziqe që vijnë nga Lindja dhe Jugu sipas veçorive të ndryshme, por ato kanë të përbashkët parimet e mbrojtjes kolektive, menaxhimin e krizës dhe sigurinë bashkëpunuese. Shqetësimet e të gjithë krahut Lindor dhe Juglindor të Aleancës janë të dukshme. Por, ne kemi planifikuar dhe organizuar të gjitha masat e nevojshme nga rreziqet e ndryshme që mund të vijnë”, nenvizoi Kodheli. Ndërkaq, ajo shprehu mirënjohjen dhe mbështetjen e saj, për të gjithë ushtarakët dhe oficerët kudo që ata janë.

Ndersa kryeministri Rama u shpreh se ky përvjetor vjen sot në një kohë kur Shqipëria ka mundësi të mëdha, ndërsa kujtoi se vetëm disa dekada më parë një naëtarësim i tillë dukej i paimagjinueshëm. “Mirënjohja i shkon anëtarëve të Aleancës së Atlantikut të Veriut, i shkon popujve dhe qeverive të tyre që duke hapur dyert për Shqipërinë i dhanë popullit tonë të drjetën për t’u ndier të barabartë, në një tyrezë me kaq shumë vendimmarrje botërore”, tha Rama. Kryeministri Rama u shpreh se, “Shqipëria dhe shqiptarët kudo që ndodhen do të jenë mirënjohës për rolin që NATO ka luajtur duke i dhënë fund luftrave në rajonin tonë”.“Shqipëria e meriton vendin që ka në tryezën e lartë të vendimmarrjes së Aleancës së Atlantikut të Veriut. Dhe ashtu siç nënvizoi, miku ynë, ambasadori Lu, pavarësisht se është vendi më i voglë i NATO-s, mbetet vendi më entuziast për praninë në të”, tha Rama. “Sot 6 vjet pas anëtarësimit në NATO sfidat e Aleancës janë shtuar. Agresioni rus në Ukrainë, valët e një barbarie të dhunshme në formën më diabolike të terrorizmit janë shtruar përpara nesh si pjesë në NATO-s, por dhe Aleancë unike e lirisë me një nevojë të madhe për të riorganizuar të gjitha poltikat për të përshtatur politikat tona në këto kushte”, tha Rama. Ndërsa Ambasadori i Shteteve të Bashkuara të Amerikës, Donald Lu duke shprehur suksese të vazhdueshme për forcimin e Aleancës së Atlantikut të Veriut, por dhe për forcimine Foracave të Armatosura të Shqipërisë, theksoi se, Shqipëria, pavarësisht se është vendi më i vogël i NATO-s, mbetet vendi më entuziast për praninë në të.