Aeroporti i Vlorës, Rama: Fluturimi i parë gati në fund të 2024, nëse nuk ka supriza rrugës

Kjo e premte e ka gjetur kryeministrin Edi Rama në Vlorë, ku për herë të parë, në turin paraelektoral, kryetari i Bashkisë nuk është krah tij, pasi Dritan Leli është ”non-grata” për PS-në. Rama po zhvillon një takim me operatorët turistikë dhe banorët e zonës, ku edhe foli për aeroportin, për të cilin pohoi se  punimet po shkojnë shumë mirë dhe se fluturimi i parë do të bëhet në fund të vitit 2024.

”E kemi nisur me dy kantierë që do i japin një shtysë turizmit, portin e ri turistik të Vlorës që do sjellë një tjetër kategori turistësh dhe patjetër që do stimulojë një pjesë tjetër të zinxhirit ekonomik, dhe porti i ri tregtar që do lehtësojë shumë industrinë e peshkimit.

Kantieret e reja që janë hapur dhe që do hapen besoj që do i japin impuls të rëndësishëm Vlorës, rruga e re Orikum-Dukat, lidhja e saj me tunelin dhe kalimi në anën tjetër të Llogarasë dhe Bypass-i që është funksional janë pjesë të një infrastrukture për dekada që do rrisë kapacitetin e qarkullueshmërisë.

Jemi shumë optimistë që do kemi fluturim e parë në fund të vitit 2024, shpresojmë që mos të kemi surpriza sepse jemi mësuar që jo gjithçka varet nga plani dhe vullneti”.