Agim Kajmaku për akuzat e PD: Nuk jam marr me trafiqe

Agim Kajmaku, fituesi i zgjedhjeve një partiake në Bashkinë e Vorës ka reaguar pas publikimit të dokumenteve të PD që tregojnë se ai është dënuar në Greqi. Në deklaratën e tij, Kajmaku nuk jep një përgjigje të qartë për akuzën e PD-së, por thotë se duhet të flasin institucionet.

Partia Demokratike tha se Kajmaku është akuzuar për përdorimin e parave të falsifikuara, ndërsa Kajmaku thotë se “nuk jam marr me trafiqe”.

Postimi i plotë i Agim Kajmakut në Facebook:

“Që pas marrjes së detyrës si kryetar i Bashkisë së Vorës, ata s’u përballen nga frika e humbjes së padiskutueshme, më janë vërsulur me tërbim!

Por unë siguroj me bindje, në radhë të parë qytetarët e Vorës se i qëndroj pikë për pikë asaj që kam deklaruar edhe më herët lidhur për këtë sulm. Unë nuk jam marrë kurrë me trafiqe dhe krime. Kam qenë dhe jam punëtor e familjar. Kam punuar për të nxjerrë bukën e gojës në Shqipëri e në emigracion dhe emrin e kam ndryshuar si të gjithë shqiptarët, që të më jepej mundësia të rrija atje dhe punoja.

Partia Demokratike po merret me limona dhe me mandarina emigrantësh shqiptarë, të cilët halli i ka shtyrë të punojnë në një vend të huaj! Ata bëjnë sikur nuk e dinë se çfarë kanë hequr shqiptarët për të mbijetuar me emra e me mbiemra nga më të ndryshmit në Greqi. Në fakt PD është limoni i shtrydhur që s’i duhet më asnjeriu. Le ta thonë autoritetet fjalën e tyre dhe të na falin qytetarët për këtë shqetësim!

Unë dua të siguroj qytetarët e Vorës se pavarësisht kësaj poshtërsie, jam dhe do të jem në çdo moment në krye të detyrës! Ju më besuat në 30 qershor për t’i ndryshuar faqen Vorës sonë dhe për t’a vënë bashkinë në shërbim të qytetarëve”.

PD publikon dokumentin: Agim Kajmaku është arrestuar në Greqi