Agim Nesho: Manifestimi i Presidentit për të gjetur zgjidhje, duhen zgjedhje të parakohshme të lira

Diplomati Agim Nesho, ka komentuar ndër të tjera edhe manifestimin e thirrur nga Presidenti Meta si edhe paralajmërimin e tij për maxhorancën se çfarë do të ndodhë pas 15 marsit.

“Mesazhet e Presidentit ishin shumë të qarta. Ishin mesazhe në pamundësi të një dialogu, kur kemi raste të përsëritura të shkeljes së Kushtetutës dhe një lloj imponimi të vazhdueshëm që kërkon të bëjë maxhoranca nëpërmjet arrogancës. Kjo ishte e vetmja mënyrë për të thirrur popullin. Ajo që më bëri përshtypje ishte pjesëmarrja masive e popullit në shesh. Dhe ata njëzëri thirrën ‘Shpërndaje parlamentin’

Në fakt këtu janë prishur të gjitha balancat. Këtu kemi një regjim, një klik që po kërkon me të gjitha format arrogante deri në pafundësi pushtetin e saj. Këtë e shikon edhe në diskursin se si përpiqen ti imponohen atyre pak deputetëve të opozitës ku përpiqen ti drejtojnë në fjalimet e tyre në parlament. Dhe Presidenti tha pas 15 marsit. Iniciativa e Presidentit është për të gjetur një zgjidhje. Demokracia është për të gjetur edhe një zgjidhje institucionale”,- tha Nesho.

Ai shtoi se “pas 15 marsit, Presidenti kërkon një reflektim sadopak të maxhorancës. E vetmja zgjidhje politike në Shqipëri është të bëhen zgjedhje të parakohshme lokale por edhe zgjedhje parlamentare për të kthyer legjitimitetin e popullit. Ai tha pas 15 marsit, që përfshin jo vetëm reflektimin, por edhe gjetjen e një zgjidhje. Kush është zgjidhja? Janë zgjedhjet e reja. Dhe kush është gjetja? Është 15 marsi, dhe të bihet dakord që zgjedhjet e reja janë zgjidhja …. Në disa raste diskutohet sikur është situata normale. Në fakt nuk është një situatë normale dhe në opinionin publik e ka shprehur edhe më parë. Por edhe Presidenti e ka shprehur edhe më parë. Shikojmë që kjo situatë ka një përgjigje asimetrike; nëse ti nuk respekton institucionet ligjore si mendon që pala tjetër do pëlqejë ligje që i shkojnë në shtat jetëgjatësisë tënde politike në pushtet. Sa më shumë të mbahet me zor një pushtet, aq më e rëndë do të jetë situata në vazhdim”.