Aksident tragjik në Rrugën e Arbrit, 3 të vdekur. Mes tyre dy janë vëllezër

Një aksident fatal është shënuar në vendin e quajtur Fushë-Gjoricë në aksin Bulqizë-Maqellarë në rrugën e Arbrit, ku për pasojë kanë ndërruar jetë 3 persona dhe 4 të tjerë janë plagosur rëndë.

Tre viktimat janë me të njëjtin mbiemër dhe konkretisht kanë humbur jetën Kujtim Istrefi, Murat Istrefi dhe Lulzime Istrefi.

Dy të parët gjetën vdekjen në vend, ndërsa Lulzimja vdiq në spitalin e Bulqizës.

Kronika e ngjarjes:

Dyshohet se automjeti tip Mercedes Benz 240 ku udhëtonin Kujtim dhe Murat Istrefi me dy bashkëshortet Lulzime dhe Firuze Istrefi, ka dalë nga një rrugë dytësore duke dalë nga fshati Gjoricë ku kishin qenë për vizitë dhe në momentin që kanë dalë në rrugën nacionale i kanë prerë rrugën automjetit tip Mercedes Benz me targa angleze.

Si pasojë e shpejtësisë përplasja ka qenë shumë e fuqishme dhe mjeti ku udhëtonin viktimat është ndarë në 2 pjesë.

Nga aksidenti kanë humbur jetën 3 persona dhe kanë mbetur të plagosur 4 të tjerë.

Mësohet se dy prej viktimave janë identifikuar si Kujtim dhe Murat Istrefi  vëllezër, nga Maqellara ndërsa e shoqja e njërit prej viktimave Lulzime Istrefi ka humbur jetën rrugës për në spital.

Po ashtu sqarohet se 4 të plagosurit janë dërguar për në spital dhe po marrin ndihmën mjekësore.

Tre nga të plagosurit Mërgim Lazri 25 vjeç, Edison Lazri 20 vjeç, Kadrie Markeçi, ishin në mjetin tip Mercedes Benz me targa angleze, ndërsa Firuze Istrefi 56 vjeç është bashkëshortja e një prej viktimave që ishte në makinën tjetër.