Alarmi i DASH për ekonominë shqiptare buzë greminës, Basha: Vetëm këtë vit 100 milionë euro më pak investime të huaja
Duke marrë shkas nga raporti më i fundit i Departamentit Amerikan të Shtetit për situatën tejet shqetësuese të të bërit biznes në Shqipëri, kryetari i Partisë Demokratike Lulzim Basha deklaron se alarmi i DASH-it është një tregues për ekonominë shqiptare e cila ndodhet buzë greminës.
Në reagimin e tij përmes rrjeteve sociale, Basha thotë se vetëm këtë vit janë 100 milionë euro më pak investime të huaja.
Po ashtu, Basha deklaron se investitorët e mëdhenj, strategjikë dhe seriozë, u zëvëndësuan me kompani offshore, PPP dhe koncesionet korruptive
Nisur nga kjo, kreu i Opozitës së Bashkuar thekson se lufta kundër korrupsionit, anulimi i PPP-ve korruptive, ulja e taksave dhe taksa e sheshtë 9% do ta bëjnë Shqipërinë vendin e investimeve të mëdha
Deklarata e plotë e Lulzim Bashës
Është alarmante situata e investimeve të huaja në Shqipëri. Vetëm gjatë këtij viti, shifra e rënies së investimeve është 100 milionë euro. Çuarja e ekonomisë shqiptare buzë greminës së falimentit, është një nga shqetësimet kryesore të pasqyruara në raportin e përvitshëm të DASH, që rendit si arsye korrupsionin e qeverisë shqiptare, shkatërrimin e tregut dhe konkurrueshmërisë nga PPP-të, ligjet abuzive në lidhje me pronat dhe gjithashtu konçesionet korruptive.
Asgjë nuk e fsheh dot më rritjen e varfërisë dhe papunësisë, ekonominë e rrënuar dhe largimin masiv të shqiptarëve. Çdo raport ndërkombëtar flet qartas për mungesën e klimës pozitive për biznesin dhe investimet e huaja.
Dy investitorët e vetëm strategjike, TAP dhe Devolli, po e perfundojnë punën e tyre të nisur që në kohën e qeverisjes së PD. Në 7 vite, në Shqipëri ka mbizotëruar klima e largimit të investitorëve strategjikë dhe seriozë. Në vend të tyre lulëzuan kompanitë offshore, PPP-të dhe konçensionet, që veç korrupsionit në çdo hallkë, nuk ofruan asnjë shërbim cilësor apo përmirësim të jetës së qytetarëve.
Në këto kushte, një nga angazhimet e mia parësore, është që t’i kthej shqiptarëve mundësinë e tregut të lirë dhe frymëmarrjen konkurrencës së ndershme në çdo sektor të ekonomisë. Lufta kundër korrupsionit, anullimi i PPP-ve korruptive, ulja e taksave dhe taksa e sheshtë 9% do ta bëjnë Shqipërinë vendin e investimeve të mëdha dhe serioze, që bashkë me zhvillimin ekonomik do të sjellë dhe rritjen e numrit të vendeve të reja të punës me paga dinjitoze.
