Aleanca me Metën për 14 majin, Berisha: Asnjë kandidat nuk mund të garojë pa kaluar primaret

Kryetari i Partisë Demokratike, Sali Berisha këtë të enjte firmosi marrëveshjen me kreun e Partisë së Lirisë, Ilir Meta për zgjedhjet lokale të 14 majit, dhe në ”Open”, thotë se asnjë kandidat nuk mund të garojë si përfaqësues i këtyre dy partive pa kaluar primaret.

“PL ka pranuar si metodën më demokratike, ka pranuar të kontribuojë primaret. Asnjë kandidat nuk mund të garojë si përfaqësues i këtyre dy partive pa kaluar primaret. Ky është në fakt bashkim në dy parime themelore.

Në parimin e primareve, pra të delegimit përfundimtar të vendimmarrjes tek anëtarësia dhe simpatizantët, në përmbysjen e përfaqësimit të deritanishëm.

Parimi i dytë themelor është referendumi, në të cilin dy forcat tona zotohen të bëjnë gjithçka për të drejtën e referendumit. Besojmë se demokracia shqiptare ka nevojë jetike për shprehjen e vullnetit të shqiptarëve.

Partia e Lirisë ka pranuar primaret si praktika demokratike e përzgjedhjes së kandidatëve. Kandidatët në këto zgjedhje mund të jenë nga shoqëria civile, mund të jenë pa parti”.