Alibeaj: Berisha i paaftë të fitojë, qeveria teknike si karamele

Deputeti i pavarur, Enkelejd Alibeaj teksa ka folur për situatën politike, tha se ”mosbindja civile”  nuk sjell asgjë, veçse ka përfituar mazhoranca duke kaluar ligjet pa debat. Kërkesën e Sali Berishës për qeveri teknike, e quan një karamele që ish-kryeministri kërkon t’ua shesë shqiptarëve në prag të zgjedhjeve. Sipas tij, është thjesht një paaftësi e atij grupi opozitar që të fitojë zgjedhjet.

”Ky që vjedh me patronazhistë, ky që vjedh me buxhet, vinka një ditë e bukur dhe të jepka qeverinë. Kjo nuk ndodh dhe duhet të jemi realistë. Paaftësi e atij segmenti opozitar për të synuar qeverisjen. Më 26 korrik kishin në dorë një mjet që përmes listave të hapura, të mos i jepnin dhuratë Ramës edhe 12 mandate në tavolinë.

Që në këtë moment që u nënshtruan, treguan që nuk e kanë më synim qeverisjen. Janë të nënshtruar aty te Rama, ca do Rama e bëjnë ata, e bënë me amnistinë edhe me listat e mbyllura. Janë shumë të vonuar për të kërkuar qeveri teknike, nëse duan ta shesin si karamele që po luftojmë për votën e shqiptarëve, duhej ta kishin treguar që në korrik”, vijoi Alibeaj.