Alibeaj flet nga Brukseli kundër Berishës: Protesta ndaj Europës, jo mjeti i duhur

Nga Brukseli, kreu i grupit parlamentar të PD-së, Enkelejd Alibeaj ka dalë kundër Sali Berisha në lidhje me protestën që do të zhvillohet më 6 dhjetor, në të njëjtën ditën e Samitit të BE-së me Ballkanin Perëndimor. Për të protestat ndaj Bashkimit Europian, nuk janë mjeti i duhur. Alibeaj thotë se shqetësimet u duhen shprehur evropianëve, jo nëpërmjet protestave.

”Protestat ndaj Evropës, nuk besoj se është mjeti i i duhur. Ne, shqiptarët kanë nevojë për Evropën. Evropa do duhet konsideruar si dashamirësi dhe një mjet shtesë që monitoron demokracinë e plagosur rëndë në Shqipëri. Shtetin e së drejtës, shtetin ligjor, të drejtat e individëve.

Instrumenti, të cilin do duhet të ndjekim, do duhet të jetë i tillë që të jetë funksional dhe të jetë funksional, unë mendoj, së bashku me kolegët e mi, kemi zgjedhur që të gjithë ato shqetësime, që mund t’i thotë kushdo në Shqipëri, t’i çojë në veshin e evropianëve.

Dhe jo vetëm kaq, se kjo është e pamjaftueshme, por të marrë premtimin, angazhimin, mobilizimin e Evropës, që t’i bëhet krah shqiptarëve. Ne kemi zgjedhur këtë rrugë dhe unë besoj se kjo është rruga më funksionale”.