Alibeaj: Ka tentativë për të përçarë grupin. Për Presidentin, vendimin do ta marrin të gjithë së bashku

Kryetari i Grupit Parlamentar të PD-së, Enkelejd Alibeaj, mësohet të ketë thënë gjatë mbledhjes se ka një tentativë për të përçarë grupin e PD-së. Po ashtu ai ka thënë se secili nga anëtarët e këtij grupi kanë bërë përpjekje për të mos lejuar përçarjen e partisë. Në këtë mbledhje nuk morën pjesë 17 deputetë të PD-së.

”Sot nuk kemi për të marrë asnjë vendim, sepse mbledhja është me natyrë informale për informimin tuaj për ecurinë e deri tanishme dhe shkëmbimin e mendimeve.

Me disa prej kolegëve kam diskutuar edhe personalisht dhe i di mendimet e tyre. Më intereson që vendimin për procesin ta marrim të gjithë bashkë, në një moment tjetër, pasi të kemi ezauruar fazën e marrjes së mendimit të secilit. Ka një tentativë për të përçarë edhe Grupin Parlamentar, edhe pse gjatë këtij muaji kemi bërë përpjekje serioze për të bashkuar grupin. Nuk e kuptoj dot këtë sjellje dhe është një tjetër akt përçarës.

Secili nga anëtaret e këtij grupi kanë bërë përpjekje për të mos lejuar përçarjen e partisë. Refuzoj me forcë çdo të tentativë për ndarjen e partisë, dhe me gjithçka kam në dorë do bëj çmos që kjo mos të ndodh”.