Ambasada pasqyron vizitën e kryetares Spiropali dhe të delegacionit në Parlamentin e Mbretërisë së Bashkuar

Ambasada e Mbretërisë së Bashkuar në Shqipëri ka pasqyruar takimet e Kryetares Elisa Spiropali dhe të delegacionit të Kuvendit të Shqipërisë si edhe veprimtaritë e tjera që u zhvilluan në 15 janar në kuadrin e kësaj vizite.

“Kryetarja e Parlamentit të Shqipërisë, Elisa Spiropali, dhe delegacioni i saj vizituan Parlamentin e Mbretërisë së Bashkuar për bisedime të rëndësishme me Kryetarin e Dhomës së Komunëve, Sir Lindsay Hoyle. Ky shkëmbim parlamentar përfshiu disa momente kyçe, si pjesëmarrja e delegacionit në Pyetjet për Kryeministrin dhe takimet me Grupin Parlamentar për Shqipërinë dhe Kosovën.

Gjatë diskutimeve produktive të dyja palët ranë dakord për vlerën e partneritetit Mbretëri e Bashkuar-Shqipëri, përfshirë nivelin parlamentar, dhe për rëndësinë e ruajtjes së praktikave më të mira demokratike gjatë zgjedhjeve të ardhshme.

Mbretëria e Bashkuar mbetet e angazhuar për të punuar me Parlamentin e Shqipërisë për të mbështetur rrugëtimin demokratik të vendit dhe u bën thirrje të gjithë institucioneve të mbështesin zgjedhjet e lira e të ndershme.”, shkruhet në rrjetet sociale të Ambasadës së Mbretërisë së Bashkuar në Tiranë.